دۇنيەجۇزىلىك كوشپەندىلەر ويىندارى: «بىرلىك كەرۋەنى» جامبىل وبلىسىنان باستالدى

Көшпенділер ойыны
Фото: Көшпенділер ойыны дирекциясы

استانا. قازاقپارات - 5-دۇنيەجۇزىلىك كوشپەندىلەر ويىندارىنىڭ باستالۋىنا 2 اي ۋاقىت قالدى. دۇنيەجۇزىلىك كوشپەندىلەر ويىندارىندا سپورت جارىستارىنان بولەك مادەني ءارى عىلىمي باعدارلامالار دا قولعا الىنعان.

جىلدىڭ ەڭ ماڭىزدى وقيعاسى سانالاتىن ويىنداردى قولداۋعا جانە جوبانى حالىق اراسىندا ناسيحاتتاۋ ماقساتىندا مادەني باعدارلاما اياسىندا جامبىل وبلىسىندا «بىرلىك كەرۋەنى» اتتى ايماقتىق ۇلكەن جوبا باستالدى.

Көшпенділер ойыны
Фото: Көшпенділер ойыны дирекциясы

جامبىل وبلىسى قورداي اۋدانىنىڭ نوعايباي اۋىلىندا، ىرعايتى وزەنىنىڭ جاعالاۋىندا «بىرلىك كەرۋەنى» بارىسىندا ۇلتتىق ناقىشتارمەن جاسالعان ەتنواۋىل قۇرىلىپ، 6 كيىز ءۇي تىگىلدى. ءار كيىز ءۇي وزىندىك ەرەكشەلىگىمەن تاقىرىبىنا ساي بەزەندىرىلدى. ەتنواۋىلدا قازاقتىڭ سالت-داستۇرلەرىنىڭ كورىنىسى، تاريحي جادىگەرلەر كورمەسى، اۋداننان شىققان تانىمال تۇلعالاردىڭ كىتاپ كورمەسى، ۇلتتىق ويىندار، كوشپەلى جابدىقتار كورمەسى ءوتتى.

Көшпенділер ойыны
Фото: Көшпенділер ойыны дирекциясы

«بۇگىنگى ۇيىمداستىرىلىپ وتىرعان شارا حالقىمىزدىڭ مادەني مۇراسىن، ونىڭ ىشىندە ۇلتتىق قۇندىلىقتار مەن ۇلتتىق ويىندارىن ناسيحاتتاۋدا، قازاقستان حالقىنىڭ باي تاريحى مەن مادەنيەتىن تانىستىرۋدا، حالىقتىڭ بىرلىگىن، ىنتىماعىن ارتتىرۋدا ماڭىزى زور. بۇل - اتا-بابامىزدىڭ تۇرمىس-سالتىن، جالپى بولمىسىن پاش ەتەتىن ەرەكشە مادەنيەت ورنى بولدى، دەسەك قاتەلەسپەيمىز. قورداي اۋدانى ىنتىماعى جاراسقان، تۇراقتىلىقتى تۋ ەتكەن قاسيەتتى مەكەن. ەلوردادا وتەتىن كوشپەندىلەر ويىنىن دا جوعارى دەڭگەيدە وتكىزىپ، بىرلىكتىڭ ۇلگىسىن كورسەتەمىز دەگەن سەنىمدەمىن»، - دەپ پىكىر ءبىلدىردى ارداگەر سپورتشى مىقتىبەك التىباي.

ۇيىمداستىرۋشىلار قازاق كۇرەسى، اۋدارىسپاق، ساداق اتۋ، توعىزقۇمالاق، اسىق اتۋ، ارقان تارتۋ سەكىلدى ۇلتتىق ويىنداردان جارىستار وتكىزدى.

قوناقتار ۇلتتىق تاعامدار فەستيۆالىندە ءدام تاتسا، ساحنا الاڭىندا قازاقتىڭ ۇلتتىق اندەرى مەن بيلەرىنەن كونسەرتتىك باعدارلاما ۇيىمداستىرىلدى.

جامبىل وبلىسىنىڭ مادەنيەت قايراتكەرلەرى باستاعان «بىرلىك كەرۋەنى» جوباسى ەلىمىزدىڭ بارلىق ايماعىندا ۇيىمداستىرىلادى. كوشپەندىلەر مادەنيەتىنىڭ نەگىزىندە قۇرىلعان «بىرلىك كەرۋەنى» 5-دۇنيەجۇزىلىك كوشپەندىلەر ويىندارىن رەسپۋبليكا كولەمىندە سەزىنۋگە مۇمكىندىك بەرەدى.

اۆتور كۇنسۇلتان وتارباي

سوڭعى جاڭالىقتار