دۇنيەجۇزىلىك كوشپەندىلەر ويىندارى: العاشقى التىن فرانسيا قورجىنىنا ءتۇستى
استانا. قازاقپارات - V دۇنيەجۇزىلىك كوشپەندىلەر ويىندارىنىڭ العاشقى جارىس كۇنىندە سپورتشىلار جامبى اتۋ سپورتىنىڭ ماجار ءستيلى بويىنشا جۇلدەگە تالاستى.
جامبى اتۋعا 27 مەملەكەتتەن 78 سپورتشى قاتىستى. ولار 11 توپقا ءبولىنىپ، ۇزدىكتەر ىرىكتەلىپ شىقتى.
ناتيجەسىندە فرانسيا قۇراماسىنىڭ سپورتشىسى رافاەل مالەت ءدۇبىرلى دودانىڭ العاشقى التىن مەدالىن يەلەندى. موڭعوليا وكىلى التانكۋياگ نەرگيۋ كۇمىس جۇلدەنى ولجالادى. فرانتسيانىڭ تاعى ءبىر وكىلى گايتان بلوت «قولاعا» قول جەتكىزدى.
قازاقستان ۇلتتىق قۇراما مۇشەسى ابزال ت ۇلىبەكوۆ ۇزدىك بەستىككە ىلىكتى.
«ماجار ستيلىنىڭ ەرەكشەلىگى - سپورتشى اتپەن جىلدامىراق شاۋىپ، نىساناعا كوپ وق تيگىزۋ كەرەك. جەبە سانىنا شەكتەۋ جوق. قازاقستان ديرەكتسياسى بارلىق سپورتشىنى اتپەن قامتاماسىز ەتتى. توقسانعا جۋىق اتتى دايىندادىق. كوشپەندىلەر ويىندارىنا ۇلتتىق قۇراما سپورتشىلارى ءۇش اي دايىندالدى. جىل باسىنان بەرى ءتورت وقۋ- جاتتىعۋ جينىن وتكىزدىك. ءار سپورتشىعا جەكە تاكتيكا ازىرلەدىك»، - دەدى جامبى اتۋدان قازاقستان ۇلتتىق قۇراماسىنىڭ باس باپكەرى ەلدوس باداشيەۆ.
ايتا كەتەيىك، قازاقستان قۇراماسى ساپىندا ايتبەك سارىباي، ەرالحان ايكوز، باتىر بەكساۋىت، ابزال تۋلىبەكوۆ باق سىنادى. سپورتشىلارىمىز بۇعان دەيىن الەم، ەۋروپا چەمپيوناتتارىندا جۇلدەلى ورىنداردى يەلەنگەن.
سپورتشىلارىمىز الداعى ءۇش كۇندە 3 ستيل (ازيا، تۇرىك، قازاق) بويىنشا جۇلدەگە تالاساتىن بولادى.
اۆتور
ەربول جانات
