دەنساۋلىققا ەڭ قاۋىپتى ۇن ءتۇرى
گاستروەنتەرولوگ جانە ەندوكرينولوگ ديليارا لەبەدوۆا Telegram-ارناسىندا ءبيداي ۇنىنىڭ ادام اعزاسىنا توندىرەر قاۋپى تۋرالى ەسكەرتتى.
دارىگەردىڭ ايتۋىنشا، دەنساۋلىققا زيان ۇن ءتۇرى - ءبيداي ۇنى. بۇل ۇننىڭ مۇلدە بيولوگيالىق ماڭىزى جوق. ونىڭ گليكەميالىق يندەكسى جانە كالوريا مولشەرى جوعارى، قۇرامىندا ىشەكتىڭ تۇكتى بولىگىندە جينالاتىن جانە دارۋمەندەر مەن باسقا دا پايدالى زاتتاردىڭ تولىق سىڭۋىنە جول بەرمەيتىن گليۋتەن بار.
مامان ءبيداي ۇنىنان اسىرەسە سەمىزدىك، گليۋتەنگە توزبەۋشىلىك جانە قانت ديابەتى بار ادامدار اۋلاق بولۋ كەرەگىن ايتتى.
ءبيداي ۇنىن كۇرىش، بادام جاڭعاعى، امارانت، كوكوس نەمەسە قاراقۇمىق ۇنىنا اۋىستىرعان ءجون.
ايتا كەتەيىك، بۇعان دەيىن ۇن سۇرىپتارىنىڭ ايىرماشىلىعى قانداي ەكەنى حابارلانعان بولاتىن.
ءبيداي ۇنىنىڭ جوعارى، ءبىرىنشى جانە ەكىنشى سۇرىپتارى بار.
جوعارى سۇرىپتى ءبيداي ۇنى. بۇل ۇننىڭ ءتۇسى اق-سارعىلت كەلەدى. ۇن بىركەلكى، الاقانعا الىپ ۇستاعاندا بوتەن زاتتار سەزىلمەيدى. ۇننىڭ وسى ءتۇرى ءتۇرلى نان ونىمدەرىن پىسىرۋدە ەڭ كوپ قولدانىلادى. بۇل ۇننان پىسىرىلگەن ونىمدەر جاقسى كوتەرىلىپ، بىركەلكى پىسەدى. مامانداردىڭ ايتۋىنشا، جوعارى سۇرىپتى ءبيداي ۇنىن قاتپارلانعان، اشىتقان نە قۇمدى قامىرعا قولدانعان دۇرىس.
ءبىرىنشى سۇرىپتى ءبيداي ۇنى ۇستاعاندا جۇمساق، مايدا قىلىپ تارتىلعان، اقشىلداۋ كەلەدى. ءبىرىنشى سۇرىپتى ۇننىڭ جابىسۋ قاسيەتى جاقسى، سوندىقتان ودان يىلگىش قامىر جاساۋعا بولادى. ەرەكشە ءپىشىندى، ۇلكەن كولەمدى نان ونىمدەرىن ءدال وسى ۇننان پىسىرگەن دۇرىس. بالىشتەر، ناندار، قۇيماقتار، كەسپە، جايما وسى ۇننان جاقسى شىعادى.
ەكىنشى سۇرىپتى ءبيداي ۇنى - ۇن اراسىنداعى دارۋمەندەر مەن ميكروەلەمەنتتەرگە باي بولادى. بۇل ۇننان ناننىڭ ءتۇر-ءتۇرىن، پەچەنەلەر پىسىرىلەدى. В1، В2، РР، Е دارۋمەندەرى مەن اقۋىزدار وسى ەكىنشى سۇرىپتى ۇندا بولادى. ءتۇسى جاعىنان ول جوعارى سۇرىپتى جانە ءبىرىنشى سۇرىپتى ۇنداردان كۇڭگىرت، قۇرامىندا كەبەكتەر بولۋى مۇمكىن. الايدا بۇل - ەڭ پايدالى ءبيداي ۇنى.
