دەنساۋلىق ساقتاۋ مينيسترلىگى مەديتسينا قىزمەتكەرلەرىن قورعاۋعا قاتىستى باستاما كوتەردى

استانا. KAZINFORM - دەنساۋلىق ساقتاۋ مينيسترلىگى كاسىبي مىندەتتەرىن ورىنداۋ بارىسىندا مەديتسينا قىزمەتكەرلەرىنە بىرنەشە رەت شابۋىل جاساۋىنا بايلانىستى مەديتسينا ماماندارىنىڭ قىزمەتىنە كەدەرگى كەلتىرىپ، ولارعا زورلىق-زومبىلىق كورسەتكەنى ءۇشىن قىلمىستىق جاۋاپكەرشىلىككە تارتۋدى ەنگىزۋدى ۇسىندى.

2019-جىلدان بەرى مەديتسينا ماماندارىنا 161 رەت شابۋىل جاساۋ فاكتىلەرى تىركەلدى. ال، بيىل مامىر ايىندا الماتىدا جەدەل جاردەم فەلدشەرىنە ونى شاقىرعان ادامدار قول كوتەرىپ، پاتەرىندە قاماعان. قاراعاندىدا قىزمەتتىك مىندەتتەرىن ورىنداۋ بارىسىندا جەدەل جاردەم قىزمەتكەرىن اياۋسىز ۇرىپ-سوققان. تەمىرتاۋدا دا جەدەل جاردەم كولىگىنىڭ جۇرگىزۋشىسى تاياق جەپ، تونالعان.

بۇگىنگى تاڭدا ولارعا قول تيگىزۋدەن قورعاۋ قولدانىستاعى زاڭ اياسىندا جۇرگىزىلەدى (قىلمىستىق كودەكس جانە اكىمشىلىك قۇقىق بۇزۋشىلىق تۋرالى كودەكس).

دارىگەرلەردى قورعاۋدى كۇشەيتۋ ماقساتىندا مينيسترلىك مەديتسينا ماماندارىنىڭ كاسىبي قىزمەتىنە كەدەرگى كەلتىرگەنى جانە ولارعا قارسى قىلمىستىق ارەكەتتەر بويىنشا قىلمىستىق جاۋاپكەرشىلىككە تارتۋدى ەنگىزۋگە باستاما كوتەردى. سول ءۇشىن 2024-جىلدىڭ 12-ساۋىرىندە دەنساۋلىق ساقتاۋ سالاسىنداعى قىزمەتكەرلەردىڭ قاۋىپسىزدىگىن قامتاماسىز ەتۋ بويىنشا كەشەندى جوسپار بەكىتىلدى.

باس پروكۋراتۋرامەن بىرلەسە قىلمىستىق كودەكسكە وزگەرىستەر ازىرلەندى، وندا مەديتسينا ماماندارىنا قاتىستى زورلىق-زومبىلىق ارەكەتتەرى ءۇشىن قىلمىستىق جاۋاپكەرشىلىك قاراستىرىلعان. قىلمىستىق كودەكسكە «مەديتسينا قىزمەتكەرىنىڭ زاڭدى قىزمەتىنە كەدەرگى كەلتىرۋ» جانە «مەديتسينا قىزمەتكەرىنە قاتىستى زورلىق-زومبىلىق كورسەتۋ» دەگەن جاڭا باپتار ەنگىزۋ ۇسىنىلۋدا.

- بۇل قادامدار مەديتسينا قىزمەتكەرلەرىن قورعاۋعا جانە قاۋىپسىز جۇمىس ورنىن قۇرۋعا باعىتتالعان، - دەپ اتاپ ءوتتى دەنساۋلىق ساقتاۋ مينيسترلىگى.

ەسكە سالساق، بۇعان دەيىن وسكەمەندە قۇقىق بۇزۋشىنى ۇستاعان جەدەل جاردەم قىزمەتكەرلەرى ماراپاتتالعانىن جازعان ەدىك.