«دەنساۋلىق پاسپورتى» انىقتاما تۇرىندە ەمحانالاردا تەگىن بەرىلەدى
استانا. KAZINFORM - ءبىرىنشى سىنىپ وقۋشىلارىنىڭ اتا- انالارىنا «دەنساۋلىق پاسپورتى» كىتابىن ساتىپ الۋدىڭ قاجەتى جوق.
ەندى ول تىركەلگەن جەرى بويىنشا ەمحانالاردا انىقتاما تۇرىندە تەگىن بەرىلەدى، ال بولاشاقتا سيفرلاندىرىلماق. بۇل تۋرالى و ك ق الاڭىندا وتكەن دوڭگەلەك ۇستەل بارىسىندا ق ر دەنساۋلىق ساقتاۋ مينيسترلىگى انا مەن بالا دەنساۋلىعىن ساقتاۋ دەپارتامەنتى ديرەكتورىنىڭ م. ا. ايگەرىم وسپانوۆا ايتتى.
ونىڭ ايتۋىنشا، ەلىمىزدىڭ بارلىق رەسپۋبليكالىق جانە وڭىرلىك بالالار اۋرۋحاناسىندا 25 مىڭنان استام توسەك-ورىن قاراستىرىلعان. 2023 -جىلى تاۋلىك بويى جانە كۇندىزگى ستاتسيونار قۇرامىندا 82 مىڭنان استام بالا ەمدەلدى، 40 مىڭنان استام بالا امبۋلاتوريالىق دەڭگەيدە مەديتسينالىق كومەك الدى. 18 جاسقا دەيىنگى بالالار مەديتسينالىق كومەكتى تەگىن الادى.
تۇقىم قۋالايتىن تۋا بىتكەن اۋرۋلاردى جانە دامۋداعى اۋىتقۋشىلىقتاردى ەرتە انىقتاۋ ءۇشىن تۋعاننان كەيىنگى العاشقى كۇندەردە سكرينينگتىڭ 4 ءتۇرى قاراستىرىلعان. جىل سايىن تۋعاننان 18 جاسقا دەيىنگى بالالارعا پروفيلاكتيكالىق تەكسەرۋلەر جۇرگىزىلەدى، 2023 -جىلى 5, 5 ميلليوننان استام بالا قامتىلدى.
«بالالار دەنساۋلىعىن ساقتاۋدىڭ باستى جەتىستىكتەرىنىڭ ءبىرى - جوعارى مامانداندىرىلعان مەديتسينالىق كومەكتى دامىتۋ. بىلتىر تۋا بىتكەن جۇرەك اقاۋى بار 1708 بالاعا اشىق جۇرەككە وپەراتسيا جاسالدى، %47 ى ءبىر جاسقا دەيىنگى بالالارعا جاسالدى. جاڭا تۋعان نارەستەلەردەگى مينيمالدى ءينۆازيۆتى ەندوۆيدەوحيرۋرگيانىڭ ۇلەسى %40 عا دەيىن ءوستى. اسا اۋىر جاعدايلاردا بالالاردىڭ ءومىرىن قۇتقارۋ ءۇشىن قازاقستاندا تەلەمەديتسينالىق تەحنولوگيالار مەن مەديتسينالىق اۆياتسيا ىسكە اسىرىلدى. سوڭعى 3 جىلدا ەلىمىزدە قالپىنا كەلتىرۋ جانە وڭالتۋ بويىنشا توسەك- ورىن سانى 2 ەسەگە ارتتى. قازىر 4219 توسەك-ورىن بار»، - دەپ اتاپ ءوتتى سپيكەر.
بالالار مۇگەدەكتىگىنىڭ الدىن الۋ ماقساتىندا بارلىق وڭىردە ۇرىقتى قورعاۋدىڭ 20 ورتالىعى قۇرىلدى. مەكتەپكە دەيىنگى جانە مەكتەپ مەديتسيناسى باسقارماسى قۇرىلدى. بالالارعا پروفيلاكتيكالىق كومەكتى جەتىلدىرۋ ءۇشىن وقۋ- اعارتۋ مينيسترلىگى بالالاردى زورلىق- زومبىلىقتان قورعاۋ، سۋيتسيدتىڭ الدىن الۋ جانە ولاردىڭ قۇقىقتارى مەن ءال-اۋقاتىن قامتاماسىز ەتۋ بويىنشا بىرلەسكەن جۇمىس جۇرگىزىپ جاتىر.
