دەموكراتتار ترامپتى سوتقا بەردى
استانا. KAZINFORM - دەموكراتيالىق پارتيانىڭ باس پروكۋرورلارى ا ق ش پرەزيدەنتى دونالد ترامپتىڭ تۋا بىتكەن ازاماتتىقتى الىپ تاستاۋ تۋرالى جارلىعىنا بايلانىستى سوتقا شاعىم ءتۇسىردى، دەپ حابارلايدى kazinform.

ترامپ قۇجاتقا قول قويعاننان كەيىن ماسساچۋسەتس، نيۋ- دجەرسي، كاليفورنيا جانە ەل استاناسى ۆاشينگتوندا 18 دەموكراتيالىق شتاتتىڭ باس پروكۋرورلارى بۇل قادامدى كونستيتۋتسياعا قايشى دەپ اتاپ، سوتقا شاعىم ءتۇسىردى، دەپ حابارلايدى NPR.
- بۇل ونىڭ ەكىنشى مەرزىمىندەگى قورقىنىشتى ءۇنى بولدى. مەنىڭ پرەزيدەنت ترامپقا ءبىر ايتارىم بار: سوتتا كەزدەسكەنشە، - دەدى كاليفورنيانىڭ باس پروكۋرورى روب بونتا.
دۇيسەنبىدە امەريكانىڭ ازاماتتىق بوستاندىقتار وداعى (ACLU) سوتقا ترامپتىڭ بۇيرىعىنا توسقاۋىل قويۋعا باعىتتالعان شاعىم ءتۇسىردى.
- امەريكا قۇراما شتاتتارىندا تۋىلعان بالالارعا ازاماتتىق بەرۋدەن باس تارتۋ تەك كونستيتۋتسياعا عانا قايشى ەمەس، سونىمەن قاتار ۇقىپسىز جانە اياۋسىز تۇردە امەريكالىق قۇندىلىقتاردى جوققا شىعارۋ بولىپ سانالادى، - دەدى ACLU اتقارۋشى ديرەكتورى ەنتوني رومەرو.
ازاماتتىق سوعىستان كەيىن 1868 - جىلى راتيفيكاتسيالانعان 14- تۇزەتۋدە «امەريكا قۇراما شتاتتارىندا تۋىلعان نەمەسە ناتۋراليزاتسيالانعان جانە ونىڭ يۋريسديكتسياسىنا جاتاتىن بارلىق ادام اۆتوماتتى تۇردە ەل ازاماتى بولادى» دەپ كورسەتىلگەن.
بۇل كونستيتۋتسيادا افروامەريكالىقتاردىڭ تولىق ازاماتتىق قۇقىقتارىن بەلگىلەۋ ءۇشىن ازىرلەنگەن بولاتىن. ءبىراق عاسىردان استام ۋاقىت بويى اتا- انالارىنىڭ يمميگراتسيالىق مارتەبەسىنە قاراماستان ا ق ش- تا تۋىلعان بارلىق بالاعا بۇل قۇقىق بەرىلدى.
- پرەزيدەنتتىڭ كەشە جاساعان ءىسى زاڭسىز، كونستيتۋتسياعا قايشى. ءبىز يمميگرانتتار مەملەكەتىمىز. ءبىزدىڭ مەملەكەتتە ميلليونداعان ادامدار تۋا بىتكەن ازاماتتىققا قول جەتكىزدى. بۇل ءبىزدىڭ مەملەكەتىمىزدىڭ جانە امەريكانىڭ تاريحى جانە ول ءبىزدىڭ كونستيتۋتسيامىزدا ناقتى سەبەپتەرمەن بەكىتىلگەن، - دەدى نيۋ- دجەرسي باس پروكۋرورى مەتيۋ پلاتكين.
ا ق ش كونستيتۋتسياسىنا تۇزەتۋلەر كونگرەستىڭ كەڭ قولداۋىن قاجەت ەتەدى. ءبىراق كاليفورنيا مەن نيۋ- يورك گۋبەرناتورلارىمەن قوسا دەموكراتيالىق كوشباسشىلاردىڭ كوبىسى بۇل شەشىمگە نارازىلىق تانىتىپ جاتىر.
ايتا كەتەيىك، ترامپ ءولىم جازاسىن فەدەرالدى دەڭگەيدە قايتا ەنگىزدى. سونداي- اق، ا ق ش باسقا ەلدەردىڭ دامۋىنا كومەك كورسەتۋدى توقتاتادى.
اق ءۇي ا ق ش پرەزيدەنتى دونالد ترامپتىڭ ا ق ش- تىڭ دۇنيەجۇزىلىك دەنساۋلىق ساقتاۋ ۇيىمىنان شىعاتىنى تۋرالى جارلىعىن جاريالادى.