دەمالىس كۇندەرى قازاقستاندا قار جاۋىپ، كوكتايعاق بولادى

استانا. KAZINFORM - «قازگيدرومەت» ر م ك-سى الداعى دەمالىس 12-14-قازان كۇندەرىنە اۋا رايى بولجامىن جاريالادى.

سينوپتيكتەردىڭ بولجامىنشا، الداعى دەمالىس كۇندەرى قازاقستان اۋماعى اركتيكالىق سۋىق ەنۋمدىڭ ەپيسەنترىندە بولادى، ەلىمىزدىڭ باسىم بولىگىندە قار جاۋادى، رەسپۋبليكانىڭ ورتالىعىندا جانە شىعىسىندا كورىنۋ قاشىقتىعىعىن ناشارلاتاتىن قاتتى قار جاۋادى، ال جولداردا كوكتايعاق كۇتىلەدى.

قازاقستاننىڭ وڭتۇستىگى مەن وڭتۇستىك- شىعىسىندا جاڭبىر، تاۋلى اۋدانداردا جاۋىن-شاشىن جاڭبىر مەن قار تۇرىندە بولادى دەپ بولجانعان. رەسپۋبليكا بويىنشا جەل كۇشەيەدى، تۇنگى جانە تاڭەرتەڭگى ساعاتتاردا تۇمان تۇسەدى.

ەلىمىزدىڭ باتىسىندا عانا انتيسيكلوننىڭ اسەرىنەن اشىق اۋا-رايى بولجانادى، ءبىراق انتيسيكلون تۇنگى تەمپەراتۋرانىڭ 5-10 گرادۋس ايازعا دەيىن تومەندەۋىن كۇشەيتەدى، قالعان اۋماقتاردا تەرمومەترلەر 2-10 گرادۋس مينۋس بەلگىگە دەيىن تومەندەيدى، تەك وڭتۇستىك ايماقتاردا تۇندە 5-10 گرادۋس جىلى كۇتىلەدى.

ەسكە سالا كەتەيىك، بۇگىن سولتۇستىك قازاقستان وبلىسىندا كۇن سۋىتىپ، تۇنىمەن جاۋعان قاردىڭ ارتى بورانعا ۇلاسقانىن جازعان بولاتىنبىز. سينوپتيكتەر مۇنداي اۋا رايى ءالى ءبىر-ەكى كۇن ساقتالاتىنىن ايتادى.