دەمالىس كۇندەرى مەدەۋ- شىمبۇلاق باعىتىنداعى اۆتوبۋستار 01:35-كە دەيىن جۇرەدى

الماتى. KAZINFORM - دەمالىس جانە مەرەكە كۇندەرى قالا ىشىنەن مەدەۋ مەن شىمبۇلاققا قاراي قاتىنايتىن №12-اۆتوبۋستارعا جولاۋشىلار سىيماي قالىپ جاتادى. بۇل باعىتتاعى قوعامدىق كولىكتە ادامداردىڭ تالاسا مىنگەن بەينەجازبالارى الەۋمەتتىك جەلىدە ءجيى تارايدى. وسى ورايدا، Kazinform ءتىلشىسى قالالىق موبيلدىلىك باسقارماسىنان اتالعان باعىت بويىنشا جاڭا اۆتوبۋس مارشرۋتىن جۇرگىزۋ قانشالىقتى مۇمكىن ەكەنىن سۇرادى.

باسقارما جاۋابىنا سايكەس، «الماتى-1 ۆوكزالى - مەدەۋ» باعىتىنداعى №12-مارشرۋتقا «الماتىەلەكتروترانس» ج ش س كوممۋنالدىق اۆتوبۋس پاركى قىزمەت كورسەتەدى. قىزمەت كورسەتۋ ساپاسىن ارتتىرۋ ماقساتىندا، 2024 -جىلدىڭ باسىندا مارشرۋتتىڭ جىلجىمالى قۇرامى 2023 -جىلعى جاڭا Yutong ماركالى اۆتوبۋستارمەن جاڭارتىلعان.

سونداي-اق بۇرىن جۇمىس كۇندەرى مارشرۋتتا 12 اۆتوبۋس، دەمالىس جانە مەرەكە كۇندەرى - 16 اۆتوبۋس قىزمەت كورسەتسە، قازىرگى ۋاقىتتا، سىرعاناۋ ماۋسىمىنىڭ اشىلۋىنا جانە «مەدەۋ» كەلۋشىلەرىنىڭ ارتۋىنا بايلانىستى مارشرۋت قوسىمشا 4 اۆتوبۋسپەن كۇشەيتىلگەن. وسىلايشا، جۇمىس كۇندەرى مارشرۋتتا 16 اۆتوبۋس، دەمالىس جانە مەرەكە كۇندەرى 20 اۆتوبۋس قاتىنايتىن بولدى.

- مارشرۋتتىڭ جۇمىس ۋاقىتى جۇمىس كۇندەرى 23:35-تەن 01:00-گە دەيىن، دەمالىس جانە مەرەكە كۇندەرى 24:00-دەن 01:35-كە دەيىن ۇزارتىلدى. بۇگىنگى كۇنى قوسىمشا مارشرۋت ۇيىمداستىرۋ ماسەلەسى قاراستىرىلىپ جاتقان جوق، - دەپ حابارلادى قالالىق موبيلدىلىك باسقارماسىنان.

ەسكە سالايىق، بۇعان دەيىن 2025 -جىلى «الما-اراسان» رادون كوزى جاڭارتىلاتىنى تۋرالى جازعانبىز.

اۆتور
دوسبول اتاجان