دەلي-الماتى رەيسىندە تىرىسقاققا كۇدىكتى جولاۋشى انىقتالدى
استانا. KAZINFORM — دەلي-الماتى باعىتى بويىنشا Air Astana رەيسىنىڭ بورتىندا سانيتارلىق-كارانتيندىك باقىلاۋدى جۇزەگە اسىرۋ بارىسىندا ءىش ءوتۋ، ايقىن السىزدىك، اۋىزدىڭ قۇرعاۋى تۋرالى شاعىمدارى بار جولاۋشى انىقتالدى.
دەنساۋلىق ساقتاۋ مينيسترلىگىنىڭ دەرەگىنشە، قىرعىز رەسپۋبليكاسىنىڭ ازاماتى دەليدەن قىرعىزستانعا الماتى قالاسى ارقىلى بارماق بولعان.
سانيتارلىق- كارانتيندىك باقىلاۋ ماماندارى جۇقپالى اۋرۋعا كۇدىكتى ايەلدى مەديتسينالىق تەكسەرۋدى جەدەل ۇيىمداستىرىپ، تالداۋ ناتيجەلەرىن العاننان كەيىن «تىرىسقاق» دياگنوزى قويىلدى.
جاقىن بايلانىستا بولعان جولاۋشىلار انىقتالدى، زەرتحانالىق تەكسەرۋ تاعايىندالدى. ناۋقاس جانە بايلانىستا بولعان جولاۋشىلار الماتى قالاسىنىڭ ينفەكتسيالىق ستاتسيونارىنا جاتقىزىلدى.
اۋە كەمەسىنىڭ بورتىندا دەزينفەكتسيا جۇرگىزىلدى.
بورتتاعى جولاۋشىلار اراسىندا اۋرۋدىڭ بەلگىلەرى جانە تىرىسقاق اۋرۋىنىڭ الدىن الۋ شارالارى تۋرالى اقپاراتتىق تۇسىندىرمە جۇرگىزىلىپ، سيمپتومدار پايدا بولعان كەزدە دەرەۋ مەديتسينالىق كومەككە جۇگىنۋ ۇسىنىلدى.
«ەپيدەميولوگيالىق قىزمەتتەر تاراپىنان ينفەكتسيا وشاعىن ۋاقتىلى انىقتاۋ جانە وقشاۋلاۋ تىرىسقاقتىڭ ەل ىشىندە تارالۋىنا جول بەرمەۋگە مۇمكىندىك بەردى. ناۋقاس اۋرۋحاناعا جاتقىزىلدى جانە كلينيكالىق حاتتاماعا سايكەس بارلىق قاجەتتى مەديتسينالىق كومەكتى الادى»، - دەدى ۆەدومستۆودان.
تىرىسقاق اۋرۋى بويىنشا قولايسىز ەلدەرگە (افريكا، ازيا، ونىڭ ىشىندە ءۇندىستان، اۋعانستان، پاكىستان ەلدەرى) باراتىن ازاماتتارعا ۇسىنىستار:
* قايناتىلعان نەمەسە بوتەلكەدەگى سۋدى ءىشىڭىز؛
* ءار ءتۇرلى سۋسىنداردى سالقىنداتۋ ءۇشىن مۇزدى پايدالانۋدان اۋلاق بولىڭىز؛
* تۇتىنار الدىندا ونىمدەردى سايكەسىنشە تەرميالىق وڭدەڭىز؛
* جەمىستەر مەن كوكونىستەردى قايناتىلعان نەمەسە بوتەلكەدەگى سۋمەن مۇقيات جۋىڭىز؛
* ءار تاماق الدىندا جانە دارەتحاناعا بارعاننان كەيىن قولىڭىزدى سابىنداپ مۇقيات جۋىڭىز؛
* تەك رۇقسات ەتىلگەن سۋ ايدىندارىندا شومىلىپ، ونىڭ وزىندە اۋىز قۋىسىنا سۋدىڭ كىرۋىنە جول بەرمەڭىز؛
* اۋرۋدىڭ العاشقى بەلگىلەرى پايدا بولعان كەزدە ءوزىن-ءوزى ەمدەۋگە بولمايدى، دەرەۋ مەديتسينالىق كومەككە جۇگىنۋ كەرەك.
