دۇكەندەگى ازىق-تۇلىكتىڭ نەشە پايىزى وتاندىق وندىرۋشىلەرگە تيەسىلى بولۋى كەرەك
استانا. KAZINFORM - قازىرگى كەزدە ەلىمىزدەگى دۇكەن سورەلەرىندەگى ازىق-تۇلىكتىڭ نەشە پايىزى وتاندىق وندىرۋشىلەرگە تيەسىلى؟ بۇل سۇراققا ق ر ساۋدا جانە ينتەگراتسيا مينيسترلىگى جاۋاپ بەردى.
- قازىرگى كەزدە ىشكى ساۋدا ەرەجەلەرىنە سايكەس، ساۋدا جەلىلەرىندە جانە بازارلاردا وتاندىق تاۋار وندىرۋشىلەردىڭ ازىق-تۇلىك تاۋارلارى كەمىندە 30 پايىز كولەمىندە ورنالاستىرىلۋى ءتيىس. 2024-جىلعى 6-ساۋىردەگى زاڭعا سايكەس، مينيسترلىك ىشكى ساۋدا سۋبەكتىلەرىنە مەملەكەتتىك قولداۋ كورسەتۋ جونىندەگى وكىلەتتىكتەرگە يە. وسى زاڭدى ىسكە اسىرۋ ءۇشىن ۆەدومستۆو ىشكى ساۋدا سۋبەكتىلەرىندە جەكە كاسىپكەرلىكتى مەملەكەتتىك قولداۋ كورسەتۋ ەرەجەلەرىن قابىلدادى، وندا مەملەكەتتىك قولداۋ العان ۇيىمدار ءۇشىن 20 پايىز ازىق-تۇلىك جانە 20 پايىز ازىق-تۇلىك ەمەس وتاندىق تاۋارلاردىڭ سورەلىك ورىنعا ورنالاستىرىلۋى تۋرالى مىندەتتەمەلەر ساقتالدى. وسىلايشا، ىشكى ساۋدا سۋبەكتىلەرى وتاندىق ازىق- تۇلىك تاۋارلارىن سورەلەردە 50 پايىزعا دەيىن (ىشكى ساۋدا ەرەجەلەرى بويىنشا 30 پايىز جانە وعان قوسا مەملەكەتتىك قولداۋ ەرەجەلەرى بويىنشا 20 پايىز) ورنالاستىرۋى قاجەت، ال وتاندىق تۇرمىستىق تاۋارلار 20 پايىزدان كەم ەمەس بولۋى ءتيىس، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.
سونىمەن قاتار، ىشكى ساۋدا ەرەجەلەرىنە سايكەس، ىشكى ساۋدا سۋبەكتىلەرى وتاندىق ونىمدەردىڭ سورەلەردە ورنالاسۋ ورىندارىن ارنايى بەلگىلەرمەن نەمەسە «قازاقستاندا جاسالعان» جازۋىمەن ايقىنداۋى ءتيىس. وتاندىق ونىمدەردى حالىق اراسىندا كەڭىنەن سۇرانىسى بار تاۋارلارمەن قاتار «كروسس-مەرچەندايزينگ» ادىسىمەن ورنالاستىرۋ كەرەك. مۇنىمەن قوسا، ولاردى كوزگە كورىنەتىن جانە قولعا وڭاي الۋعا بولاتىن ورىندارعا قويۋ كەرەك. وتاندىق تاۋار وندىرۋشىلەردى قولداۋ ماقساتىندا 2023-2024-جىلدارى مەملەكەتتىك «قازاقستاندا جاسالعان» جول كارتاسى جۇزەگە اسىرىلدى. بۇل جول كارتاسى اياسىندا جارمەڭكەلەر مەن ارنايى كورمەلەر ۇيىمداستىرىلدى.
- قازاقستاندىق وندىرۋشىلەردىڭ وڭ ءيميدجىن قالىپتاستىرۋ ءۇشىن اقپاراتتىق ناۋقاندار وتكىزىلىپ، «قازاقستاندا جاسالعان» تاڭباسى بار ونىمدەردىڭ ساپاسى مەن قاۋىپسىزدىگى تۋرالى وڭ پىكىر قالىپتاستىرۋعا باعىتتالعان شارالار تۇراقتى تۇردە اتقارىلىپ جاتىر. 2023-جىلى ساۋدا جانە ينتەگراتسيا مينيسترلىگى ساۋدا جەلىلەرى مەن ءىرى ساۋدا وبەكتىلەرىندە تاۋارلاردى جەتكىزۋ بويىنشا كەلىسىمشارت جاساۋعا نەمەسە كەلىسىمشارت جاسالعان جاعدايدا ولاردىڭ ديسكريميناتسيالىق سيپاتىن انىقتاۋ ماقساتىندا تەكسەرۋلەر جۇرگىزۋ قۇقىعىنا يە بولدى. وتاندىق تاۋارلاردىڭ ساۋدا سورەلەرىنە جەتكىزىلۋىن باقىلاۋ تۇراقتى جۇرگىزىپ كەلەدى، ونىڭ ىشىندە الەۋمەتتىك ماڭىزى بار ازىق-تۇلىك تاۋارلارىنا دا مونيتورينگ جاسالادى، - دەپ اتالىپ وتكەن ۆەدومستۆو اقپاراتىندا.
بۇدان بۇرىن حابارلانعانداي، جاقىندا EXPO حالىقارالىق كورمە ورتالىعىندا «Ulttyq َnim» VIII وتاندىق وندىرۋشىلەر كورمەسى ءوتتى. ءۇش كۇن بويى كورمەدە قازاقستاننىڭ بارلىق وڭىرىنەن 350 ءوندىرۋشى قاتىسىپ، ءوز ونىمدەرىن ۇسىندى.
ەسكە سالساق، بيىل ءماجىلىس دەپۋتاتى نۇرتاي سابيليانوۆ يمپورتتىق تاۋارلارعا «قازاقستاندا جاسالعان» دەگەن سەرتيفيكاتتار بەرىلگەنىن ايتىپ، وسى جاعدايدى سىنعا العان ەدى.
