دۇكەندەردەگى ءماجبۇرلى ساتىپ الۋدان قالاي قورعانۋعا بولادى

استانا. KAZINFORM - قازاقستان تۇرعىندارى ءجيى قوسىمشا قىزمەتتەر مەن تاۋارلاردى ءماجبۇرلى تۇردە ساتىپ الۋعا تاپ بولۋدا.

سمارتفون ساتىپ الۋ مىندەتتى ساقتاندىرۋمەن نەمەسە اقىلى باپتاۋلارمەن بايلانىستىرىپ بەرىلەدى، ال تۇرمىستىق تەحنيكا تەك اكسەسسۋارلارىمەن بىرگە ۇسىنىلادى. مۇنداي جاعدايلار تۇتىنۋشىلاردى اشۋلاندىرىپ قانا قويماي، زاڭ تالاپتارىن دا بۇزادى. بۇل تۋرالى تۇتىنۋشىلاردىڭ قۇقىقتارىن قورعاۋ كوميتەتىنىڭ اقپاراتىندا ايتىلعان.

زاڭ نە دەيدى؟

قازاقستان رەسپۋبليكاسىنىڭ «تۇتىنۋشىلاردىڭ قۇقىقتارىن قورعاۋ تۋرالى» زاڭىنىڭ 28-بابىنا سايكەس، ساتۋشى تاۋاردى نەمەسە قىزمەتتى قوسىمشا ونىممەن مىندەتتى تۇردە ساتىپ الۋدى تالاپ ەتۋگە قۇقىعى جوق. ءاربىر تۇتىنۋشى ەركىن تاڭداۋ قۇقىعىنا يە. ەگەر سىزگە تاۋاردى تەك قوسىمشا ساتىپ الۋمەن عانا ۇسىنسا، بۇل - ءسىزدىڭ قۇقىقتارىڭىزدىڭ تىكەلەي بۇزىلۋى.

ساراپشىلار مۇنداي ارەكەتتەردىڭ باستى سەبەبىن دۇكەندەردىڭ تابىستى ارتتىرۋعا دەگەن ۇمتىلىسىنان كورەدى. قوسىمشا ساتىلىمدار، ياعني اكسەسسۋارلار نەمەسە قىزمەتتەر، بيزنەستىڭ پايداسىن كوبەيتەدى. الايدا بۇل ستراتەگيا ۇزاق مەرزىمدى پەرسپەكتيۆادا ءتيىمسىز: كوڭىلى قالعان تۇتىنۋشىلار برەندكە دەگەن سەنىمىن جوعالتادى، ال بۇل ءوز كەزەگىندە شىعىندارعا اكەلۋى مۇمكىن.

تۇتىنۋشىلار ءۇشىن بۇل تەك ىڭعايسىزدىق قانا ەمەس، ارتىق شىعىنعا دا اكەلەدى. ساقتاندىرۋ راسىمدەۋ، اكسەسسۋارلار ساتىپ الۋ نەمەسە اقىلى باپتاۋلار تاۋاردىڭ جالپى قۇنىن ارتتىرادى. كەيبىر تۇتىنۋشىلار نارىقتاعى ۇسىنىستاردىڭ ازدىعىنا بايلانىستى قاجەتتى تاۋاردان ايىرىلىپ قالماس ءۇشىن وسىنداي شارتتارعا كونۋگە ءماجبۇر بولادى.

قۇقىقتارىڭىزدى قالاي قورعاۋعا بولادى؟

زاڭدى ءبىلىڭىز. زاڭ تۋرالى اقپاراتتىلىق - ءوز قۇقىقتارىڭىزدى قورعاۋدىڭ باستى قۇرالى. ەگەر ساتۋشى قوسىمشا تاۋارلار مەن قىزمەتتەردى مىندەتتەسە، وعان «تۇتىنۋشىلاردىڭ قۇقىقتارىن قورعاۋ تۋرالى» زاڭنىڭ 28-بابىن ەسكە سالىڭىز.

جازباشا راستاۋىن تالاپ ەتىڭىز. ساتۋشىدان قوسىمشا قىزمەتتەردى نەمەسە تاۋارلاردى ساتىپ الۋ تالابىن چەككە نەمەسە كەلىسىمشارتقا تىركەۋدى سۇراڭىز. بۇل شاعىم بەرگەن كەزدە دالەل بولا الادى.

كومەك سۇراڭىز. قۇقىقتارىڭىز بۇزىلعان جاعدايدا، تۇتىنۋشىلار قۇقىقتارىن قورعاۋ كوميتەتىنە نەمەسە ونىڭ وڭىرلىك دەپارتامەنتتەرىنە جۇگىنىڭىز. سونداي-اق، eOtinish قوسىمشاسى ارقىلى نەمەسە جەدەل جەلى نومىرىنە قوڭىراۋ شالىپ، شاعىم بەرە الاسىز.

«مىندەتتەلگەن قىزمەتتەر ادال ساۋدا قاعيداتتارىن بۇزادى. تەك زاڭدى ساقتاۋ جانە اشىق ەرەجەلەردى ۇستانۋ عانا تۇتىنۋشىلارر مەن بيزنەستىڭ اراسىنداعى سەنىمدى نىعايتا الادى. بۇل ءۇشىن ەكى تاراپتىڭ دا جاۋاپكەرشىلىگى ماڭىزدى: ساتۋشىلار تۇتىنۋشىلاردىڭ قۇقىقتارىن قۇرمەتتەۋى كەرەك، ال تۇتىنۋشىلار ءوز قۇقىقتارىن ءبىلىپ، قورعاۋدان تايىنباۋى ءتيىس. ساتۋشىلار ەستە ۇستاۋى قاجەت: تۇتىنۋشىلاردىڭ قۇقىقتارىن قۇرمەتتەي وتىرىپ، ولار تەك زاڭ تالاپتارىن ورىنداپ قويماي، ءوز بەدەلىن دە ارتتىرادى. ال تۇتىنۋشىلار زاڭدى ءتۇسىنىپ، ءوز قۇقىقتارىن قورعاۋدى ۇيرەنسە، ءار ساتىپ الۋى ءتيىمدى ءارى ادىلەتتى بولارى ءسوزسىز»، - دەپ اتاپ ءوتتى باس مامان ارداق ومىربەك.