دجوردج كلۋني بايدەندى سايلاۋعا تۇسۋدەن باس تارتۋعا شاقىردى

استانا. KAZINFORM - گولليۆۋدتىڭ ايگىلى اكتەرى جانە دەموكراتيالىق پارتيا ءۇشىن قاراجات جيناۋشى دجوردج كلۋني دجو بايدەندى ا ق ش- تاعى پرەزيدەنتتىك جارىستان شىعۋعا شاقىردى، دەپ حابارلايدى BBC.

اكتەر پرەزيدەنت ءوز مانسابىندا كوپتەگەن تايتالاستا جەڭىسكە جەتكەنىن، «ءبىراق ول جەڭە المايتىن جالعىز باسەكە - ۋاقىت ەكەنىن، ونىمەن كۇرەسە المايتىنىن» مالىمدەدى.

كلۋني New York Times گازەتىندە «بۇنى ايتۋ وتە قورقىنىشتى» ەكەنىن، ءبىراق ءۇش اپتا بۇرىن قاراجات جيناۋ شاراسىندا كەزدەسكەن دجو بايدەن 2010-جىلداعىداي ەمەس ەكەنىن جازدى.

«ول ءتىپتى 2020-جىلعى دجو بايدەن دە ەمەس. بۇل ءبارىمىز پىكىرتالاستا كۋا بولعان ادام ەدى. پارتيا جەتەكشىلەرى بىزگە ءوزىمىز، ياعني 51 ميلليون ادام كورىپ جۇرگەن ادامدى باسقا ادام دەپ ايتۋدى دوعارۋى كەرەك. بۇل - جاس ماسەلەسى. باسقا ەشتەڭە جوق. ءبىز قاراشا ايىندا مىنا پرەزيدەنتپەن جەڭىسكە جەتە المايمىز»، - دەپ قوستى كلۋني.

اكتەر وسى پىكىرى ول سويلەسكەن كونگرەستىڭ ءار مۇشەسىنىڭ الاڭداۋىمەن سايكەس كەلەتىنىن ايتتى.

بۇعان دەيىن وكىلدەر پالاتاسىنىڭ بۇرىنعى سپيكەرى نەنسي پەلوسي 81 جاستاعى دجو بايدەننىڭ دونالد ترامپپەن ءساتسىز پىكىرتالاستان كەيىن پرەزيدەنتتىك جارىستا قالۋ-قالماۋ جونىندە شەشىم قابىلداۋعا «ۋاقىتى از» ەكەنىن مالىمدەگەن.

«مەن پرەزيدەنتتىڭ سايلاۋعا ءتۇسۋ-تۇسپەۋ جونىندە ءبىرجولا شەشىم قابىلداعانىن قالايمىن. ول قانداي شەشىم قابىلداسا دا، ءبارىمىز ونى قولدايمىز، ويتكەنى ۋاقىت از قالدى»، - دەدى ول MSNBC ارناسىنداعى Morning Joe باعدارلاماسىندا.

سونىمەن بىرگە، قازىرگى پرەزيدەنتكە قولداۋ كورسەتۋدى ۇزبەگەندەر اراسىندا سەناتتاعى جەتەكشى دەموكرات چاك شۋمەر، شامامەن 60 ساياساتكەردەن تۇراتىن كونگرەسمەندەر توبى، الەكساندريا وكاسيو-كورتەس سياقتى پروگرەسسيۆتى وكىلدەر پالاتاسىنىڭ مۇشەلەرى بار.

سونداي-اق، كاليفورنيا گۋبەرناتورى گەۆين نيۋسوم بايدەندى ءالى دە «تولىق قولدايتىنىن» ايتتى.