دجو بايدەن كاليفورنياداعى ورمان ورتىنە بايلانىستى يتالياعا ساپارىن كەيىنگە شەگەردى
استانا. KAZINFORM - ا ق ش پرەزيدەنتى دجوزەف بايدەن كاليفورنياداعى ورمان ورتىنە «فەدەرالدى اۋقىمداعى تولىق شارالاردى باسقارۋعا» كوڭىل ءبولۋ ءۇشىن جوسپارلانعان يتاليا ساپارىنان باس تارتتى، دەپ جازادى شينحۋا.
بۇل تۋرالى اق ءۇيدىڭ رەسمي وكىلى سارسەنبى كەشىندە جاريالانعان مالىمدەمەسىندە حابارلادى.
سول كۇنى دجوزەف بايدەن كاليفورنيادا ءىرى اپات جاعدايىن جاريالاۋدى ماقۇلداپ، شتات، تايپالىق جانە جەرگىلىكتى بيلىكتىڭ ورمان ءورتى مەن قاتتى جەلدەن زارداپ شەككەن اۋدانداردى قالپىنا كەلتىرۋ شارالارىنا قوسىمشا فەدەرالدى كومەك كورسەتۋگە بۇيرىق بەردى.
اق ءۇيدىڭ مالىمدەمەسىندە كومەك ۋاقىتشا باسپانا مەن ۇيلەردى جوندەۋگە گرانتتار، ساقتاندىرىلماعان مۇلىك شىعىندارىن وتەۋگە ارزان نەسيە جانە اپات سالدارىنان زارداپ شەككەن جەكە تۇلعالار مەن بيزنەس يەلەرىنە كومەكتەسۋگە ارنالعان باسقا دا باعدارلامالاردى قامتۋى مۇمكىن ەكەنى ايتىلعان.
- ءبىز ءورتتى توقتاتۋ جانە قالپىنا كەلتىرۋ ءۇشىن قاجەت نارسەنىڭ ءبارىن جاساۋعا دايىنبىز. ءبىراق بۇل وتە ۇزاق جول بولاتىنىن بىلەمىز، - دەپ جازدى دجوزەف بايدەن X الەۋمەتتىك جەلىسىندە.
كاليفورنيانىڭ ەڭ تىعىز قونىستانعان وكرۋگى - لوس- اندجەلەستە بىرنەشە ءىرى ورمان ءورتى بولىپ، جەرگىلىكتى بيلىكتىڭ حابارلاۋىنشا، كەمىندە بەس ادامنىڭ ءومىرىن قيىپ، 1100 عيماراتقا زاقىم كەلتىردى. كاليفورنيا گۋبەرناتورى گەۆين نيۋسوم سەيسەنبىدە توتەنشە جاعداي جاريالادى. ءورتتىڭ جىلدام تارالۋىنا بايلانىستى ونداعان مىڭ ادام ەۆاكۋاتسيالانۋعا ءماجبۇر بولدى.
بۇعان دەيىن حابارلانعانداي، بايدەن كاليفورنيادا ورمان ورتىنە بايلانىستى اپاتتى جاعداي جاريالادى.
