Disney ستۋدياسىنىڭ كەزەكتى انيماتسيالىق فيلمى قازاق تىلىندە سويلەدى
استانا. KAZINFORM - استانادا حالىقارالىق «قازاق ءتىلى» قوعامىنىڭ ۇيىتقى بولۋىمەن Disney ستۋدياسىنىڭ «موانا 2» انيماتسيالىق فيلمى قازاق تىلىندە كورەرمەنگە جول تارتتى.
«Disney ستۋدياسىنىڭ «موانا 2» انيماتسيالىق فيلمىنىڭ قازاق تىلىندەگى نۇسقاسى كورەرمەنگە جول تارتتى. بۇل Disney ستۋدياسىنىڭ ءبىزدىڭ ۇسىنىسىمىز بويىنشا، ءوز قاراجاتىنا اۋدارىلىپ جاتقان ەكىنشى فيلم. جىل اياعىنا دەيىن تاعى ءبىر فيلم جانە كەلەسى جىلعا تاعى ءبىر فيلمدى قازاق تىلىندە ۇسىنۋ جوسپارلانعان. ءىرى حالىقارالىق ستۋديالاردىڭ قازاق تىلىنە بەت بۇرۋى، بۇل وتە ماڭىزدى. ارينە، ەلىمىزدە بۇعان دەيىن دە الەم فيلمدەرى قازاق تىلىندە دۋبلياج جاسالىپ، كورەرمەنگە ۇسىنىلىپ كەلەدى، ءبىراق ولار دەمەۋشىلەردىڭ قولداۋىمەن جۇزەگە اسىرىلدى. ۇلكەن ستۋديالار ءوز تۋىندىسىن الەمنىڭ 30 شاقتى تىلىنە اۋدارىپ ۇسىنادى، ەندى سولاردىڭ قاتارىندا قازاق ءتىلى دە بار»، - دەدى «قازاق ءتىلى» قوعامىنىڭ پرەزيدەنتى راۋان كەنجەحان ۇلى الەمدىك تۋىندىنىڭ قازاق تىلىندەگى كورسەتىلىمى بارىسىندا.
ونىڭ ايتۋىنشا، الەمدىك انيماتسيالىق فيلمدى قازاق تىلىنە اۋدارۋداعى ماقسات - انا ءتىلىن ۇلىقتاۋ، بالالاردى قازاقشا سويلەپ، ويلاۋعا باۋلۋ.
ايتا كەتسەك، اتالعان مۋلتفيلم قازاق تىلىندە ەلىمىزدىڭ بارلىق كينوتەاترىندا كورسەتىلەدى جانە دەمالىس كۇندەرى قولايلى ۋاقىتقا قويىلعان.
«دۋبلياج - ءوز الدىنا بولەك يندۋستريا. ونىڭ قازاقستاندا كەڭىنەن دامۋى وتە ماڭىزدى. ال قازاق دۋبلياجىنىڭ الدىندا تۇرعان مىندەت، كەز كەلگەن الەمدىك فيلمدى قازاقى بولمىسقا كەلتىرىپ، قازاقى ورتاعا بەيىمدەپ اۋدارىپ، كورەرمەنگە ۇسىنۋ. ول ءۇشىن تاجىريبە كەرەك، سول ءۇشىن دە بىزگە قازاق تىلىندەگى دۋبلياجدالعان فيلمدەردىڭ قاتارىن كوبەيتۋ كەرەك. بۇنى ىسكە اسىراتىن وتاندىق ستۋديالار مەن ماماندار، باسقا جاعىنان الىپ قاراساڭ جاڭا جۇمىس ورىندارى اشىلادى دەگەن ءسوز»، - دەيدى ر. كەنجەحان ۇلى.
«موانا 2» انيماتسيالىق ءفيلمىنىڭ دۋبلياج رەجيسسەرى شاح-مۇرات وردابايەۆ الەمدىك پرەمەرانىڭ قازاق تىلىنە اۋدارۋ بارىسىنا توقتالدى.
«بۇگىندە قازاق تىلىندە دىبىستالعان 40 تىڭ ۇستىندە فيلم بار. Disney اۋقىمدى كونگلومەرات بولعاندىقتان دىبىستاۋ ءبىرىڭعاي جۇيەگە نەگىزدەلگەن. بۇگىنگى كورسەتىلىمنىڭ ماتەريالدارىن ءبىز 3-4 اي بۇرىن الدىق، ال قازاق تىلىندەگى ترەيلەردى جارتى جىل بۇرىن دايىنداپ قويدىق. الدىمەن ءتۇپنۇسقا ءماتىن قازاق تىلىنە اۋدارىلادى سودان سوڭ كەيىپكەردىڭ ميميكاسىنا قاراي ۇيلەستىرىلەدى، وعان ارنايى مامان شاقىرىلادى. وسى ساتتە باستى كەيىپكەرلەردى دۋبلياج جاسايتىن ارتىستەرگە كاستينگ جاريالانادى جانە ءاربىر كەيىپكەرگە كەم دەگەندە 4-5 ۇمىتكەردى ۇسىنامىز، سوڭعى شەشىمدى اۆتورلىق كومپانيا قابىلدايدى. فيلمدى دىبىستاۋ ەكى اپتاداي ۋاقىت الادى، ەگەر مۋزىكالىق فيلم بولماسا 10 كۇننىڭ ىشىندە اياقتاۋعا بولادى، ال مۋزىكالىق بولسا 15-20 كۇن ۋاقىت قاجەت»، - دەدى شاح-مۇرات وردابايەۆ.
رەجيسسەردىڭ پايىمداۋىنشا، ەلىمىزدە دۋبلياج جاسايتىن ارتىستەر جەتكىلىكتى جانە تەحنيكالىق مۇمكىندىك تە بار.
«قارجىنى ۇنەمدەۋ جولىندا ساپانى اتتاپ كەتكەن كومپانيالار وتە كوپ، ونىڭ كەسىرى دۋبلياجعا كەسىرىن تيگىزەدى. تاعى ءبىر ماسەلە انا ءتىلى قۇندىلىعى، مىسالى، كەيبىر ەۋروپا ەلدەرىندە ءتىلدى ساقتاپ قالۋ ءۇشىن ۇكىمەت كينوتەاترلارعا انا تىلىندە كورسەتىلگەن فيلمدەر ءۇشىن سالىقتىق جەڭىلدىك قاراستىرىلعان»، - دەيدى رەجيسسەر.
Disney ستۋدياسىنىڭ كەزەكتى انيماتسيالىق ءفيلمى كەيىپكەرلەرىن قازاق تىلىندە سويلەتكەندەر قاتارىندا موانا - قازاق تىلىندە قۇرالاي وتەپوۆانىڭ داۋىسىمەن سويلەيدى. قازاقستاندىق ءانشى نازيما موانانىڭ بارلىق ءانىن ورىندايدى. سونىمەن قاتار اكتريسا اينۇر بولات موانا مەن ماۋيگە قاتەر توندىرەتىن ماتانگيدى دىبىستادى، ال ماتانگيدىڭ اندەرىن گاۋھار ءومىرزاقوۆا ورىنداسا، ءارتىس قوبىلاندى بولات الپامساداي جارتىلاي قۇداي ماۋيدى دىبىستادى. ودان بولەك باقىتجان الپەيىس كۇڭكىلدەك باعبان جانە موانا توبىنىڭ مۇشەسى كەلەنى قازاق تىلىندە سويلەتتى.
قازاق تىلىندەگى الەمدىك تۋىندىنىڭ جابىق كورسەتىلىمىنە جينالعانداردىڭ قاتارى كوپ بولدى، سونىڭ ءبىرى، قۇرمەتتى قوناق ق ر عىلىم جانە جوعارى ءبىلىم ءمينيسترى ساياسات نۇربەك.
«موانا 2» انيماتسيالىق ءفيلمىنىڭ قازاق تىلىندەگى نۇسقاسىن قولداپ، بالالارىممەن بىرگە كورۋگە ارنايى كەلدىم. قازىرگى الەمدە مازمۇنى تەرەڭ دۇنيەگە تالاسۋدا، Hollywood, Netflix, Disney ستۋدياسى تاعى باسقا الەمدىك ءىرى كومپانيالار كونتەنت ىزدەپ جاتىر. ۇلكەن سەرپىلىس، تولقىن Marvel ستۋدياسىندا بولدى، ءبىراق ول تاقىرىپتار دا ءبىتىپ جاتىر، جاڭاشىلدىق كەرەك، ال بۇل قازاقستان ءۇشىن جاڭا مۇمكىندىك، ونىڭ دالەلى بۇگىن موانا الەمدىك بالالار كەيىپكەرى قازاق تىلىندە سويلەپ جاتىر»، - دەيدى ساياسات نۇربەك ب ا ق وكىلدەرىنە سۇحبات بەرە تۇرىپ.
ءمينيستردىڭ پىكىرىنشە، قازاق ەرتەگى كەيىپكەرلەرىن (جەزتىرناق، اقساق قۇلان، ەرتوستىك تاعى سول سياقتى) حالىقارالىق ساحناعا شىعارۋدا الەۋەتىمىز بار.
«ءبىزدىڭ تىڭ يدەيالاردى ۇسىنۋ مۇمكىندىگىمىز بار. شەتەلدە وقىپ، تاجىريبە جيناپ كەلگەن وتاندىق ماماندار اياقتان تۇرىپ جاتىر. وتاندىق كينەماتوگرافيادا وڭ سەرپىلىس بار، سول ارقىلى انا ءتىلدى ىلگەرىلەتۋدىڭ جاقسى ءبىر كورىنىسى - الەمدىك دەڭگەيدەگى فيلمدەردى قازاق تىلىندە سويلەتۋ»، - دەدى ول.
بۇعان دەيىن الماتىدا قازاق تىلىنە دۋبلياجدالعان Disney ستۋدياسىنىڭ «موانا 2» انيماتسيالىق فيلمىنىڭ جابىق كورسەتىلىمى بولدى.
اۆتور
داۋلەت ىزتىلەۋ
