قازاقستاندا DiDi تاكسي قىزمەتى جابىلاتىن بولدى

نۇر- سۇلتان. قازاقپارات – 4-ناۋرىزدان باستاپ قازاقستانداعى DiDi تاكسيى ءوز قىزمەتىن توقتاتادى، دەپ حابارلايدى قازاقپارات.

«ءبىز DiDi-دەگى ميستسيامىزدى - كۇندەلىكتى ءومىردى ىڭعايلى ەتۋ دەپ بىلەمىز، ياعني جولاۋشىلار مەن سەرىكتەستەر ءۇشىن ەڭ جاقسى سەرۆيستەردى ۇسىنعىمىز كەلەدى. وكىنىشكە قاراي، بۇدان بىلاي قازاقستاندا مۇنى قامتاماسىز ەتە المايمىز، وسىعان بايلانىستى DiDi 2022 - جىلعى 4 -ناۋرىزدان باستاپ ەلدەگى جۇمىسىن توقتاتادى»، - دەپ جازىلعان كومپانيانىڭ Facebook پاراقشاسىندا.

جولاۋشىلار مەن جۇرگىزۋشىلەر 4-ناۋرىزعا دەيىن DiDi تاكسي قىزمەتىن ادەتتەگىدەي قولدانا الادى. «ءبىزدىڭ قىزمەت ىسكە قوسىلعان ساتتەن باستاپ قولداۋ كورسەتكەن بۇكىل جۇرگىزۋشىلەر مەن جولاۋشىلارعا العىس ايتقىمىز كەلەدى. 4-ناۋرىزعا دەيىن DiDi ادەتتەگىدەي جۇمىس ىستەيدى» - دەدى تاكسي قىزمەتى.

ايتا كەتەيىك، DiDi - تاكسي، كارشەرينگ جانە رايدشەرينگ قىزمەتتەرىن كورسەتەتىن قىتايلىق كونگلومەرات. كومپانيا 2012 - جىلى بەيجىڭ قالاسىندا قۇرىلعان. قازىرگى ۋاقىتتا كومپانيا ەۋروپا، ازيا، اۋستراليا، لاتىن امەريكاسىنداعى ەلدەردە ميلليونداعان ادامعا قىزمەت كورسەتەدى.