دۋبايداعى نوسەرگە بايلانىستى ەلگە قايتا الماعان قازاقستاندىقتار بۇگىن ورالادى

استانا. KAZINFORM - ءدال قازىر 289 قازاقستاندىق ەلگە قايتا الماي دۋبايدا وتىر. Air Astana اۋە كومپانياسى دۋبايدان ۇشاتىن رەيستەرگە قاتىستى سوڭعى اقپاراتتى جاريالادى.

ەسكە سالا كەتەيىك، بىرىككەن اراب امىرلىكتەرىندە نوسەر جاۋىپ، كوشەلەر مەن عيماراتتاردى سۋ الىپ كەتكەن بولاتىن.

تابيعي اپاتتان زارداپ شەككەن ايماقتاردىڭ قاتارىندا ەلدىڭ ەڭ ءىرى قالاسى دۋباي دا بار. 15-ءساۋىر كۇنى كەشكە باستالعان جاڭبىر تولاستاعان جوق.

اۋا رايىنىڭ قولايسىزدىعىنا بايلانىستى دۋباي حالىقارالىق اۋەجايىندا كەم دەگەندە 17 تۇراقتى رەيس توقتاتىلعان. رەيستىڭ توقتاتىلۋى، كەشىگۋى جانە باعىتىن وزگەرتۋ كۇنى بويى تىركەلىپ جاتىر.

ءبىرقاتار قالالاردا قوعامدىق ورىندارعا بارۋعا تىيىم سالىنىپ، كەي باعىتتار بويىنشا تەڭىز كولىگى جانە اۆتوبۋستار قوزعالىسى توقتاتىلعان.

اۋە ايلاعىن سۋ باسۋىنا بايلانىستى كەشەگى دۋباي- استانا جانە دۋباي- الماتى KC206 جانە KC898 رەيستەرى دۋباي ۋاقىتىمەن بۇگىن، 17-ساۋىردە تيىسىنشە ساعات 10.30 جانە 13: 10-دا ۇشادى دەپ جوسپارلانىپ وتىر.

«جولاۋشىلاردى تەرمينالعا ورنالاستىرىپ، ولارعا تاماق، سۋسىن جانە جامىلعى بەردىك» دەيدى كومپانيادان.

رەيستەردىڭ مارتەبەسىن مىنا سىلتەمەدەن بىلۋگە بولادى.