دۋباي شوكولادىن ساتامىن دەپ جۇرتتى الداعان ادام سوتتالىپ كەتتى

استانا. KAZINFORM - استانادا دۋباي شوكولادىن ساتامىن دەپ جۇرتتى الداعان ادام سوتتالىپ كەتتى.

استانا قالاسىنىڭ قىلمىستىق ىستەر جونىندەگى اۋدانارالىق سوتىندا بىرنەشە رەت الاياقتىق جاسادى دەپ ايىپتالعان ا- عا قاتىستى قىلمىستىق ءىس قارالدى.

وقيعا قالاي بولعان؟

ا. ەسىمدى ادام دۋباي شوكولادىن ساتامىن دەپ جابىرلەنۋشىلەردى اداستىرىپ، بىرنەشە رەت ولاردىڭ اقشالارىن يەمدەنگەن. وسىلايشا، ول 10 جابىرلەنۋشىنىڭ 301020 تەڭگە كولەمىندەگى اقشاسىن جىمقىرعان.

سوتتالۋشىنىڭ كىناسى جابىرلەنۋشىلەردىڭ ايعاقتارىمەن، بانك اۋدارىمدارىمەن جانە قىلمىستىق ءىس ماتەريالدارىمەن دالەلدەندى. پروكۋرور كۇدىكتىگە 3 جىل 6 اي باس بوستاندىعىن شەكتەۋ تۇرىندە جازا تاعايىنداۋدى سۇرادى.

سوت ۇكىمى قانداي؟

سوت ۇكىمىمەن ا. قىلمىستىق كودەكستىڭ 190-بابى 3-بولىگىنىڭ 4-تارماعىمەن كىنالى دەپ تانىلدى، ونىڭ 3 جىلعا باس بوستاندىعى شەكتەلدى.

ۇكىم زاڭدى كۇشىنە ەنگەن جوق.

ايتا كەتەيىك، ءبىراز ۋاقىت بۇرىن دۋباي شوكولادى الەۋمەتتىك جەلىدە ترەندكە اينالىپ، باعاسى كۇرت ءوستى.