دايانا فەدوسوۆا پاراليمپيادانىڭ قولا جۇلدەگەرى اتاندى

استانا. KAZINFORM - دايانا فەدوسوۆا XVII جازعى پاراليمپيادا ويىندارىنىڭ قولا جۇلدەسىن ەنشىلەدى.

J2 ساناتى بوي̆ىنشا 57 كەلىدەگى دايانا فەدوسوۆا قولا جۇلدە ءۇشىن بەلدەسۋدە تۇركيا وكىلى دەنديۋ ەشيليۋرتتى ايقىن جەڭىپ، ەل قورجىنىنا كەزەكتى جۇلدەنى سالدى.

«پاريجدە ءوتىپ جاتقان جازعى پاراليمپيا ويىندارىنىڭ كەزەكتى جارىس كۇنىندە دە ەل قورجىنى جۇلدەلەر ءتۇسىپ جاتىر. پارا دزيۋدودان الەم چەمپيوناتى مەن ازيا ويىندارىنىڭ قولا جۇلدەگەرى دايانا فەدوسوۆا بۇل جولى دا جانكۇيەرلەردى جەڭىسىمەن قۋانتىپ، پاراليمپيادانىڭ قولا مەدالىن ولجالادى. بۇل - پارا دزيۋدودان ۇلتتىق قۇراما سپورتشىلارىنىڭ پاريجدە جەڭىپ العان ەكىنشى مەدالى. كەشە اقمارال ناۋاتبەك پاريجدە ءانۇرانىمىزدى شىرقاتىپ، ەل مەرەيىن وسىرگەن ەدى. دايانانى پاراليمپيا ويىندارىنىڭ جۇلدەگەرى اتانۋىمەن شىن جۇرەكتەن قۇتتىقتايمىن! جەرلەسىمىزدىڭ الداعى ۋاقىتتا بۇدان دا جوعارى جەتىستىكتەرگە جەتۋىنە تىلەكتەسپىن»، - دەدى تۋريزم جانە سپورت ءمينيسترى ەربول مىرزابوسىنوۆ.

ايتا كەتەيىك، دايانا 2021 -جىلى وتكەن توكيو پاراليمپياداسىنا دا قاتىسىپ، جۇلدەگە ءسال جەتپەي قالعان.

ەسكە سالساق، بۇدان بۇرىن اقمارال ناۋاتبەكتىڭ جازعى پاراليمپيادا ويىندارىنىڭ جەڭىمپازى اتانعانىن جازعان بولاتىنبىز.

سونداي- اق قازاقستاندىق ءجۇزۋ شەبەرى نۇرداۋلەت جۇماعالي پاراليمپيادانىڭ كۇمىس جۇلدەگەرى بولدى.