پەداگوگتەر مەن عىلىمي قىزمەتكەرلەردىڭ جاعدايىن جاقسارتۋ، جۇك تاسىمالى: پرەزيدەنت بىرنەشە زاڭعا قول قويدى

استانا. KAZINFORM - مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە عىلىم جانە ءبىلىم بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى، دەپ حابارلادى اقوردانىڭ باسپا ءسوز قىزمەتى.

زاڭعا ەنگىزىلگەن تۇزەتۋلەردىڭ ءبىرىنشى بلوگى پەداگوگتەر مەن عىلىمي قىزمەتكەرلەردىڭ ماتەريالدىق جاعدايىن جاقسارتۋعا باعىتتالعان.

اتاپ ايتقاندا، بەلگىلى ءبىر عىلىمي دارەجەسى مەن اتاعى بار پەداگوگتەر ءۇشىن اي سايىن تولەنەتىن قوسىمشا اقى مولشەرى ۇلعايتىلدى. ماسەلەن، فيلوسوفيا دوكتورى (PhD)، بەيىنى بويىنشا دوكتور، عىلىم كانديداتى عىلىمي دارەجەسى جانە قاۋىمداستىرىلعان پروفەسسور (دوتسەنت) اتاعى ءۇشىن تولەنەتىن قوسىمشا اقى 25 ا ە ك- ءتى (92300 تەڭگە) قۇرايدى. ال عىلىم دوكتورى جانە قاۋىمداستىرىلعان پروفەسسور (دوتسەنت) عىلىمي اتاعى ءۇشىن 42 ا ە ك (155064 تەڭگە)، فيلوسوفيا دوكتورى (PhD)، بەيىنى بويىنشا دوكتور، عىلىم كانديداتى، عىلىم دوكتورى دارەجەسى جانە پروفەسسور عىلىمي اتاعى ءۇشىن 50 ا ە ك (184600 تەڭگە) مولشەرىندە قوسىمشا اقى تولەنەدى.

عىلىمي دارەجەلەرى مەن اتاقتارى ءۇشىن وسىنداي اي سايىنعى قوسىمشا اقى نەگىزگى جۇمىس ورنىندا عىلىمي- زەرتتەۋ جۇمىستارىن جۇرگىزەتىن عىلىمي قىزمەتكەرلەرگە دە بەلگىلەندى. 40 جاسقا تولماعان دارىندى جاس عالىمدارعا جوعارى جانە (نەمەسە) جوعارى وقۋ ورنىنان كەيىنگى ءبىلىم بەرۋ ۇيىمىنىڭ ەنداۋمەنت-قورىنىڭ ينۆەستيتسيالىق كىرىس قاراجاتىنان ستيپەنديا الۋ قۇقىعى بەرىلدى.

زاڭعا ەنگىزىلگەن تۇزەتۋلەردىڭ ەكىنشى بلوگى اسكەري قىزمەتشىلەرگە ءبىلىم بەرۋ جەڭىلدىكتەرىن ەنگىزۋدى كوزدەيدى. ناقتىراق ايتقاندا، مەرزىمدى اسكەري قىزمەتىن وتەگەننەن كەيىن اسكەري قىزمەتشىلەردىڭ جوعارى جانە (نەمەسە) جوعارى وقۋ ورنىنان كەيىنگى ءبىلىم بەرۋ ۇيىمدارىندا وقۋى ءۇشىن ءبىلىم بەرۋ گرانتتارىنا كۆوتالار ەنگىزىلدى.

تۇزەتۋلەردىڭ ءۇشىنشى بلوگى كاسىپكەرلىك سۋبەكتىلەردىڭ قاراجاتى ەسەبىنەن قارجىلاندىرىلاتىن عىلىمي جانە (نەمەسە) عىلىمي-تەحنيكالىق قىزمەت ناتيجەلەرىن كوممەرتسيالاندىرۋ جوبالارىنا قاتىستى زاڭنامانى جەتىلدىرۋگە باعىتتالعان. تۇزەتۋلەردىڭ ءتورتىنشى بلوگىنا سايكەس جەرگىلىكتى اتقارۋشى ورگاندارعا عىلىم جانە عىلىمي-تەحنيكالىق قىزمەت سالاسىنداعى مەملەكەتتىك ساياساتتى ىسكە اسىرۋعا قاتىسۋ جانە عىلىم مەن عىلىمي-تەحنيكالىق قىزمەتتى دامىتۋ ءۇشىن ءتيىستى جاعداي جاساۋ بويىنشا ءبىرقاتار وكىلەتتىك بەرىلەدى.

سونىمەن بىرگە مەملەكەت باسشىسى «تاۋەلسىز مەملەكەتتەر دوستاستىعىنا قاتىسۋشى مەملەكەتتەردىڭ قوعامدىق دەنساۋلىق ساقتاۋ سالاسىنداعى سانيتاريالىق- ەپيدەميولوگيالىق سيپاتتاعى توتەنشە جاعدايلاردىڭ الدىن الۋ جانە ولارعا دەن قويۋ جونىندەگى ىنتىماقتاستىعى تۋرالى كەلىسىمدى راتيفيكاتسيالاۋ تۋرالى» قازاقستان رەسپۋبليكاسىنىڭ زاڭىنا قول قويدى.

سونىمەن قاتار مەملەكەت باسشىسى «قازاقستان رەسپۋبليكاسىنىڭ ۇكىمەتى مەن تۇركيا رەسپۋبليكاسىنىڭ ۇكىمەتى اراسىنداعى حالىقارالىق قۇرامداستىرىلعان جۇك تاسىمالدارى تۋرالى كەلىسىمدى راتيفيكاتسيالاۋ تۋرالى» قازاقستان رەسپۋبليكاسىنىڭ زاڭىنا قول قويدى.

زاڭ ماتىندەرى باسپا سوزدە جاريالانادى.