دارىگەرلەر كەيدە ءتۇنى بويى تىگىنەن تىك تۇرىپ وتا جاسايدى - انەستەزيولوگپەن سۇحبات
ناۋقاسقا وتا جاساعان كەزدە، ونى امان الىپ قالۋ بىرنەشە فاكتوردان تۇرادى، سونىڭ ءبىرى - انەستەزيا. بۇگىن، 16-قازان - دۇنيەجۇزىلىك انەستەزيولوگتەر كۇنى. وسى ورايدا، Kazinform اگەنتتىگىنىڭ ءتىلشىسى ماڭىزدى ماماندىقپەن جاقىنىراق تانىسۋ ءۇشىن «ورتالىق كلينيكالىق اۋرۋحانا» ا ق انەستەزيولوگيا جانە رەانيماتسيا بولىمشەسىنىڭ جوعارى ساناتتى دارىگەرى البينا يسرايلوۆامەن سۇحبات قۇرعان ەدى.

- الدىمەن، مەديتسينا سالاسىن تاڭداۋىڭىزعا نە تۇرتكى بولدى، وسىدان باستاساق...
- دارىگەر ماماندىعى ماعان بالا كەزىمنەن ۇنادى. اناممەن بالالار ەمحاناسىنا بارعاندا كەزەك كۇتىپ وتىرعاندا دارىگەرلەردىڭ اق حالاتتا جۇرەتىنى، ەمحانانىڭ ءيىسى جاقىن تارتتى. ماماندىعىما كەلسەم، س. اسفەندياروۆ اتىنداعى ۇلتتىق مەديتسينالىق ۋنيۆەرسيتەتىن ءتامامدادىم، ماماندىقتى تاڭداۋ كەزىندە انەستەزيولوگ- رەانيماتولوگتى تاڭدادىم. ويتكەنى، بۇل ماماندىق بىرنەشە سالانى بىرىكتىرەدى جانە شەشىمدىلىكتى، ينتۋيتسيانى، ناقتىلىقتى، سەزىمتالدىقتى قاجەت ەتەدى.
№7 الماتى قالالىق كلينيكالىق اۋرۋحاناسى بازاسىندا انەستەزيولوگيا- رەانيماتولوگيا بويىنشا ينتەرناتۋرادان ءوتتىم. كوپتەگەن پاتسيەنتتەردى تانىپ، زەرتتەي وتىرىپ، وسى بولىمدە جۇمىس ىستەيمىن دەپ شەشتىم. تاجىريبەلى ماماندار قولداپ كومەكتەستى. دارىگەرلەر، انەستەزيولوگتەرمەن جاقىن تانىسا باستادىم. ءىس- شارا، كونفەرەنتسيالارعا بارىپ ءجۇردىم. «ناركوزيستەر» جانە «رەانيماتورلار» دارىگەرلەردىڭ قۇرامىنا كىردىم. 2013 -جىلدىڭ ناۋرىزىنان بەرى پرەزيدەنت ءىس باسقارماسى اۋرۋحاناسىندا جۇمىس ىستەيمىن.

- كوپشىلىك جەرگىلىكتى، ماسەلەن ءتىس ەمدەۋدە قولدانىلاتىن جانسىزداندىرۋ مەن جالپى انەستەزيانى بىلەدى، نەگىزى قانشا ءتۇرى بار؟
- انەستەزيا - ناۋقاستىڭ پروتسەدۋرانى اۋىرسىنۋىن جانە باسقا دا قولايسىزدىقتاردى جويۋ ءۇشىن كەز كەلگەن حيرۋرگيالىق ارالاسۋدى جاساماس بۇرىن قولدانىلاتىن پروتسەدۋرا. انەستەزيانىڭ نەگىزگى تۇرلەرى: جەرگىلىكتى انەستەزيا، ايماقتىق انەستەزيا (وتكىزگىش، جۇلىن، ەپيدۋرالدى) انەستەزيا - جالپى انەستەزيا (ەندوتراحەالدى انەستەزيا، كوكتامىر ىشىنە انەستەزيا) بۇل ادىستەردى قولدانۋدىڭ قاتاڭ كورسەتكىشتەرى بار. سوندىقتان، پاتسيەنت انەستەزياعا قارسى كورسەتىلىمدەر ءۇشىن الدىن الا تەكسەرۋدەن ءوتۋى كەرەك. ناۋقاستى ۋاقىتشا جانسىزداندىرۋ ءادىسىن انەستەزيولوگ وپەراتسيا جاسايتىن حيرۋرگپەن تالقىلا وتىرىپ تاڭدايدى جانە وتا كەزىندە پاتسيەنت مۇمكىندىگىنشە ىڭعايلى بولۋ ءۇشىن جالپى شەشىمگە كەلەدى.
- ال شۇعىل جاعدايدا وتا جاساعاندا انەستەزياعا قاتىستى شەشىم قالاي قابىلدانادى؟ كىم قابىلدايدى؟
- بىزدە جوسپارلى وتالار بار، بۇل دەگەنىمىز - پاتسيەنت وپەراتسياعا الدىن الا دايىندالىپ، سىناقتاردى تاپسىرىپ، 1-2 كۇن بۇرىن انەستەزيولوگپەن كەڭەسەدى. ناۋقاستىڭ جاعدايىن، ونىڭ ىلەسپە اۋرۋلارىن، قابىلدايتىن ءدارى-دارمەكتەرىن سارالايمىز. ال شۇعىل وپەراتسيالار كەزىندە دايىندالۋعا ۋاقىت جوق، ءبارى تەز جاسالادى. بارلىق قاجەتتى سىناقتار الىنىپ، پاتسيەنت وپەراتسياعا مۇمكىندىگىنشە قىسقا مەرزىمدە دايىندالادى. مۇندايدا انەستەزيولوگ پاتسيەنتكە كومەك كورسەتۋى ءۇشىن بار مۇمكىندىكتى پايدالانادى. حيرۋرگكە انەستەزيا قانشا قاجەت بولسا، سونشا ۋاقىتقا سوزىلادى، سوندىقتان انەستەزيولوگ پەن وتا جاساۋشى حيرۋرگ تىكەلەي جۇمىس ىستەيدى.
- دەمەك، انەستەزيولوگ وپەراتسيا اياقتالعانشا ناۋقاستىڭ جانىندا بولادى...
- انەستەزيولوگ - وتاعا دايىندىق جۇرگىزەتىن جانە ناۋقاستى انەستەزياعا ەنگىزەتىن دارىگەر. وتا الدىندا ناۋقاسپەن اڭگىمەلەسىپ، پسيحولوگيالىق دايىندىق جۇرگىزەتىنىن ايتتىم. وپەراتسياعا قاجەتتى دايىندىق تۋرالى كەڭەس بەرەدى، انامنەز جيناپ، قارسى كورسەتكىشتەردى، اللەرگيالىق رەاكتسيالاردىڭ بولۋى مۇمكىندىگىن انىقتايدى.
ناۋقاس وپەراتسيا ۇستەلىنە جاتقاننان كەيىن انەستەزيولوگ اۋىرسىنۋدى باسادى (انەستەزيانىڭ تۇرىنە بايلانىستى). مۇنان سوڭ وپەراتسيا كەزىندە قان قىسىمىن، يمپۋلسىن، تىنىس الۋىن مۇقيات باقىلايدى جانە ومىرلىك ماڭىزدى ورگاندار مەن جۇيەلەردىڭ قىزمەتى بۇزىلعان جاعدايدا كومەك كورسەتەدى. وتا جاساعان ساتتەن باستاپ، انەستەزيادان شىعۋىنا دەيىن باقىلايدى.
- ادام ءومىرى ءۇشىن جاۋاپتىلىقتى سەزىنۋ اۋىر ەمەس پە؟
- ءيا، وتا جاسالاتىن ادام ءومىرىنىڭ قاۋىپسىزدىگى كوبىنە انەستەزياعا بايلانىستى. مامان كەز كەلگەن ۋاقىتتا پاتسيەنتتىڭ جاعدايىن باعالاي ءبىلۋى كەرەك، وعان ءتيىستى كومەك كورسەتۋى ءۇشىن ءاردايىم دايىن بولۋى قاجەت. سوندىقتان، وپەراتسيا كەزىندە ەموتسيونالدى جانە فيزيكالىق بەلسەندىلىك جوعارى بولادى. ونىڭ ۇستىنە، وتالاردىڭ كوبى بىرنەشە ساعاتقا سوزىلادى جانە وسى ۋاقىت ىشىندە دارىگەر زەيىنىن تەك وتاعا شوعىرلاندىرۋعا مىندەتتى. ويتكەنى، انەستەزيولوگتىڭ كەز كەلگەن قاتەلىگى ناۋقاستىڭ ولىمىنە اكەلۋى مۇمكىن. ءبىر ايتا كەتەرلىگى، دۇرىس ارەكەتتىڭ ءوزى ءاردايىم ساتتىلىككە اكەلمەيدى. سول سەبەپتى، انەستەزيولوگ-رەانيماتولوگ - كۇردەلى، ءبىراق سۇرانىسقا يە ءارى پايدالى ماماندىق. مەنىڭ ويىمشا، ءبىزدىڭ سالا ماماندارى ءۇشىن شىدامدىلىق پەن جاۋاپكەرشىلىك ماڭىزدى.

- جۇمىس بارىسىندا بولعان ەستە قالارلىق وقيعامەن بولىسسەڭىز؟
- ءبىر وقيعا ەسىمدە، 2011-2012 -جىلدارى جاس جىگىت شۇعىل تۇردە رەانيماتسياعا ءتۇستى. قاتتى ۇرىپ- سوققاننان ىشكى مۇشەلەرىنە زاقىم كەلگەن، بىرنەشە جەرىنەن پىشاقتالعان. سول ءتۇنى حيرۋرگتەر مەن نەيروحيرۋرگتەر جانە انەستەزيولوگتەر بىرگە ونىڭ ءومىرى ءۇشىن كۇرەستىك. دارىگەرلەر ءتۇنى بويى تىگىنەن تىك تۇرىپ وتا جاسادى. ول مۇنان سوڭ رەانيماتسيادا 1 جارىم اي جاتتى. اجەسى، اتا-اناسى قارادى، ءوزى وتباسىنداعى جالعىز بالا ەكەن. مۇنداي جاعدايدا ءسىز ادامداردىڭ ريزاشىلىعى مەن ءۇمىتىن كورەسىز. سونىمەن، ول جازىلىپ، جارتى جىلدان كەيىن ماعان جۇمىسقا كەلدى. مەن ونى ءتىپتى تانىماي قالدىم، تولىق قالپىنا كەلگەن، ۇيلەنگەن. ول وتباسىمەن قازىر دە حابارلاسىپ تۇرامىز. ول دارىگەرلەردى ۇمىتپادى، العىسىن ايتىپ تۇرادى. جىلدا كاسىبي مەرەكەمدە گۇل جىبەرەدى. پاتسيەنتتەردىڭ وسىلاي دەنى ساۋ بولىپ جۇرگەنىن كورۋ - كەرەمەت سەزىم.
- مەرەكەڭىز قۇتتى بولسىن! اڭگىمەڭىزگە راقمەت!
اۆتور
داۋلەت ىزتىلەۋ