دارىگەرلەر الماتىلىق 2 جاسار ءسابيدىڭ اسقازانىنان 105 ءتۇيىر ماگنيتتىك مونشاقتى الدى
الماتى. KAZINFORM - الماتىدا 2 جاس 3 ايلىق بالا ماگنيت مونشاقتارىن جۇتىپ قويعان. حيرۋرگتەر شۇعىل وتا جاساپ بوگدە زاتتى الىپ شىقتى.
قالالىق دەنساۋلىق ساقتاۋ باسقارماسىنىڭ مالىمەتىنشە، 20- اقپان كۇنى بالالار شۇعىل مەديتسينالىق كومەك كورسەتۋ ورتالىعىنا 2 جاس 3 ايلىق بالا بوگدە زات جۇتۋى مۇمكىن دەگەن كۇدىكپەن جەتكىزىلدى.
رەنتگەنوگرافيا جاساعان كەزدە بالانىڭ اسقازانىندا ولشەمى 6,2×2,2 س م بولاتىن كوپتەگەن مەتالل زاتتان قۇرالعان كونگلومەرات انىقتالدى.
- دارىگەرلەر بوگدە زاتتى ەندوسكوپيالىق ادىسپەن الۋعا تىرىستى. الايدا ماگنيتتەردىڭ تىعىز جينالۋىنىڭ كەسىرىنەن بۇل مۇمكىن بولمادى. وسىعان بايلانىستى حيرۋرگيالىق ارالاسۋ - لاپاروتوميا جانە گاستروتوميا جاساۋ تۋرالى شەشىم قابىلداندى. وتا بارىسىندا بالانىڭ اسقازانىنان 105 ماگنيتتى مونشاق الىندى، - دەپ حابارلادى دەنساۋلىق ساقتاۋ باسقارماسىنان.
وپەراتسيادان كەيىن بالا جانساقتاۋ بولىمىنە جاتقىزىلىپ، كەيىن پالاتاعا اۋىستىرىلدى. قازىر جاعدايى قاناعاتتانارلىق.
وسىعان دەيىن الماتىلىق دارىگەرلەر ماگنيت جۇتىپ قويعان ەكى بالانى امان الىپ قالعان بولاتىن.
سونداي-اق اقمولا وبلىستىق بالالار اۋرۋحاناسىنىڭ حيرۋرگتارى ءتورت جاستاعى بالانىڭ ىشىنەن 39 ءتۇيىر ماگنيتتىك مونشاقتى الىپ شىعىپ، ءبۇلدىرشىننىڭ ءومىرىن ساقتاپ قالدى.
اۆتور
الما مۇقانوۆا
