دارىگەر ۇيىقتار الدىندا ءبىر قاسىق بال جەپ جاتۋدىڭ پايداسىن ايتتى

گرانادا ۋنيۆەرسيتەتىنىڭ عالىمدارى ۇيىقتار الدىندا ءبىر قاسىق بال جەپ جاتۋدىڭ پايداسى تۋرالى ايتتى، - دەپ حابارلايدى MedNovelty.

ماماندار ۇيقىنىڭ قانباۋىنان زارداپ شەگەتىن 700 ادامعا ەكسپەريمەنت جۇرگىزگەن. ولار ءۇش اي بويى ۇيىقتار الدىندا جىلى سۋعا ءبىر اس قاسىق بال ارالاستىرىپ ىشكەن. ناتيجەسىندە 650 ادامنىڭ ۇيقىسى الدەقايدا تىنىش بولعان. قالعان 50 ادام ارتىق سالماق قوسۋدىڭ الدىن الۋ ءۇشىن بالدى كوپ تۇتىنباعان.

مامانداردىڭ ايتۋىنشا، ادام تۇندە بۇيرەك ءۇستى بەزدەرىن ادرەنالين مەن كورتيزولدى اعزادان شىعارۋعا ىنتالاندىراتىن پوليساحاريد گليكوگەننىڭ جەتىسپەۋشىلىگىنەن ويانادى. ال بالدىڭ قۇرامىندا گليكوگەن كوپ.

سونداي-اق، بال قان قىسىمىن تومەندەتەتىندىكتەن، كۇنىنە ءبىر قاسىق بال جەۋ گيپەرتونياعا شالدىققان ناۋقاستار ءۇشىن دە وتە پايدالى. وعان قوسا، بۇل ءونىم قاندى توكسيندەر مەن قاجەتسىز مايلاردان تازارتۋعا قابىلەتتى.

ايتا كەتەيىك، بۇعان دەيىن كۇندە بال قوسىلعان سۋ ىشسەڭىز نە بولاتىنى حابارلانعان بولاتىن. بال قوسىلعان سۋ يممۋنيتەتتى قاتايتىپ، ەنەرگيانى ارتتىرادى، تاماق پەن تەرى ساۋلىعىنا وڭ اسەر ەتىپ، اسقورىتۋدى جاقسارتادى.

بال قوسىلعان سۋ ىشەتىن كەزدە ەسكەرۋ كەرەك جايتتار:

ساپالى بال تاڭداڭىز. ءسىز قولدانىپ جۇرگەن بال ساپالى ەكەنىنە كوز جەتكىزىڭىز. ونى سەنىمدى جەتكىزۋشىلەردەن الىڭىز.

مولشەرمەن قولدانىڭىز. بال كالوريالى ءونىم، ونى كوپ مولشەردە قولدانۋ ارتىق سالماققا اكەلۋى مۇمكىن.

ونى 1 جاسقا دەيىنگى بالالارعا بەرمەڭىز. بال اللەرگەن ءونىم بولعاندىقتان، ونى 1 جاسقا دەيىنگى بالالارعا بەرمەۋ ۇسىنىلادى. ال 1 جاستان اسقان بالانىڭ راتسيونىنا بال قوسىلعان سۋ قوسقىڭىز كەلسە، ونى پەدياترمەن اقىلداسىڭىز جانە بالدى راتسيونعا قالاي قوسۋ كەرەگى جايلى كەڭەس الىڭىز.

بال اللەرگەندى ونىمگە جاتادى. سول ءۇشىن الدىمەن وعان اللەرگياڭىز جوق ەكەنىنە سەنىمدى بولىڭىز.