دارىگەر ناۋقاستىڭ شابىلىپ قالعان ءۇش ساۋساعىن قالپىنا كەلتىردى
استانا. KAZINFORM - اكادەميك ن. ج. باتپەنوۆ اتىنداعى ۇلتتىق عىلىمي تراۆماتولوگيا جانە ورتوپەديا ورتالىعىندا 18 جاستاعى پاتسيەنتتىڭ سول قولىنىڭ ءۇش ساۋساعىن ترانسپلانتاتتاۋ بويىنشا بىرەگەي ميكروحيرۋرگيالىق وپەراتسيا جاسالدى. بۇل تۋرالى د س م باسپا ءسوز قىزمەتى ءمالىم ەتتى.
جاس جىگىت ەلەكترلىك ارانىڭ كەسىرىنەن جازاتايىم وقيعاعا تاپ بولدى.
9 ساعاتقا سوزىلعان وپەراتسيا حيرۋرگتاردان دالدىك پەن شەبەرلىكتى تالاپ ەتتى. سوڭعى وپەراتسيالىق ميكروسكوپتى قولدانۋ ارقىلى دارىگەرلەر بولىنگەن ساۋساقتاردىڭ بارلىق زاقىمدالعان تامىرلارىن، نەرۆتەرىن، سىڭىرلەرىن جانە سۇيەك قۇرىلىمدارىن قالپىنا كەلتىردى. بۇل ەلەمەنتتەردىڭ شاعىن كولەمىنە جانە وپەراتسيانىڭ جوعارى كۇردەلىلىگىنە قاراماستان، بارلىق دانەكەر تىندەر ءساتتى بىرىكتىرىلدى.
«بۇل وپەراتسيا ءبىزدىڭ ورتالىقتا كورسەتىلەتىن مەديتسينالىق كومەكتىڭ ەڭ جوعارى دەڭگەيىنىڭ جارقىن مىسالى بولىپ تابىلادى. زاماناۋي جابدىقتى پايدالانۋ جانە ءبىزدىڭ مامانداردىڭ جيناقتالعان تاجىريبەسى بىزگە ەڭ قيىن جاعدايلاردى ءساتتى شەشۋگە مۇمكىندىك بەرەدى»، - دەپ اتاپ ءوتتى اكادەميك ن. ج. باتپەنوۆ اتىنداعى ۇ ع ت و و ميكروحيرۋرگيا جانە قول جاراقاتى بولىمشەسىنىڭ مەڭگەرۋشىسى ماقسۇت يبرايەۆ.
بيىلعى جىلى بۇل ورتالىقتا جاسالعان قول ساۋساقتارىنىڭ ءارتۇرلى سەگمەنتتەرىن قايتا ترانسپلانتاتتاۋ بويىنشا ءساتتى وپەراتسيا ەكەنىن اتاپ وتكەن ءجون. بارلىق الدىڭعى پاتسيەنتتەر ترانسپلانتاتتالعان ساۋساقتاردىڭ قىزمەتىن تولىعىمەن قالپىنا كەلتىردى.
بۇعان دەيىن حابارلاعانىمىزداي، قىزىلوردادا ءبىر كۇندە ەكى ناۋقاسقا بۇيرەك ترانسپلانتاتسيا جاسالدى.
سونداي-اق قازاقستاندا ورگان ترانسپلانتاتسياسىن قاجەت ەتەتىندەر سانى كوبەيگەنى حابارلاندى.
