دارىگەر ەمىنىڭ ناتيجەلى بولۋى مەدبيكەنىڭ قىزمەتىنە بايلانىستى

Гүлзада Рахымбаева
فوتو: الماتى دەنساۋلىق ساقتاۋ باسقارماسى

الماتى. قازاقپارات - 12-مامىر - حالىقارالىق مەدبيكەلەر كۇنى. مەديتسينا سالاسىندا قىزمەتى تومەن بولسا دا، اتقاراتىن ءرولى جوعارى مەدبيكەنىڭ قادىرىن باسى اۋىرىپ، بالتىرى سىزداعان كەز كەلگەن ادام تۇسىنەدى. ناۋقاستى دارىمەن عانا ەمەس، جىلى سوزبەن دە ەمدەۋ كەرەك.

27 جىلدان بەرى وسى قىزمەتىن ادال اتقارىپ كەلە جاتقان الماتى قالالىق كارديولوگيالىق ورتالىعىنىڭ اعا مەدبيكەسى گۇلزادا راحىمبايەۆا وسىلاي دەپ ويلايدى.

گۇلزادا راحىمبايەۆا الماتى قالالىق كارديولوگيالىق ورتالىعىنا 27 جىل بۇرىن مەدبيكە بولىپ جۇمىسقا قابىلدانعان. سودان بەرى ۇزدىكسىز ەڭبەك ەتىپ كەلە جاتىر. قازىر ول رەانيماتسيا ءبولىمىنىڭ اعا مەدبيكەسى. بار عۇمىرىن مەديتسينا سالاسىنا ارناعان گۇلزادا راحىمبايەۆا - ءوز ورتاسىنداعى ەڭ تاجىريبەلى مامان، جاستارعا ۇلگى بولىپ جۇرگەن جان.

«مەديتسينا سالاسىنا دەگەن قىزىعۋشىلىعىم بالا كۇنىمدە پايدا بولدى. ويتكەنى، مەنىڭ انام فەلدشەر بولعان. بۇل ماماندىق مەيىرىمدىلىكتى، شىدامدىلىق پەن ەپتىلىكتى قاجەت ەتەدى»، - دەيدى ول.

مەدبيكەنىڭ ايتۋىنشا، مەدبيكەلەردى تەك دارىگەردىڭ ايتقانىن ورىنداۋشى عانا دەپ تۇسىنۋگە بولمايدى، ولار - دارىگەردىڭ سەنىمدى سەرىكتەسى. دارىگەر تاعايىنداعان ەمىنىڭ ناتيجە بەرۋى وسى مەدبيكەلەرگە بايلانىستى.

اسىرەسە، رەانيماتسيا بولىمىندە جۇمىس ىستەيتىن مەدبيكەلەردىڭ ارقالاعان جۇگى اۋىر. ولار كۇن سايىن ءولىم مەن ءومىردىڭ اراسىنداعى ادامداردىڭ امان قالۋى ءۇشىن كۇرەسەدى.

«بۇل توپتىق جۇمىس. تەك كۇش بىرىكتىرۋ ارقىلى عانا جاقسى ناتيجەگە قول جەتكىزۋگە بولادى. دارىگەر تەراپيانى تاعايىندايدى، ءبىز ءبارىن ادال ورىندايمىز. ءومىر مەن ءولىم اراسىندا جاتقان ناۋقاستاردى ءجىتى باقىلاپ، ولاردىڭ ومىرگە قايتا كەلۋىنە ۋاقىتپەن ساناسپاي، بار كۇش-جىگەرىمىزدى جۇمسايمىز»، - دەيدى مەدبيكە.

گۇلزادا راحىمبايەۆا ۋاقىتپەن ساناسپاي جۇمىس ىستەيتىندەرىن تىلگە تيەك ەتتى.

«ءبىزدىڭ تۇسكى اسقا بەلگىلەنگەن ۋاقىتىمىز جوق. ەگەر بىزدە پاتسيەنت كوپ بولسا، وندا تۇسكى ۇزىلىسكە شىقپايمىز. ەس-ءتۇسسىز قالىپتاعى ناۋقاستى ارىپتەستەرىمىزبەن كەزەكتەسىپ قارايمىز»، - دەپ اتاپ ءوتتى گۇلزادا.

ايتۋىنشا، جاۋاپكەرشىلىگى مول رەانيماتسيا بولىمىندە 16 مەدبيكە جۇمىس ىستەيدى.

اۆتور
الما مۇقانوۆا

سوڭعى جاڭالىقتار