دارىگەر ەشقانداي بەلگىسىز داميتىن بۇيرەكتىڭ قاۋىپتى ەكى اۋرۋى تۋرالى ايتتى
استانا. KAZINFORM - نەسەپ-تاس اۋرۋى العاشىندا ەشقانداي بەلگى كورسەتپەي، كەيىن قاتتى اۋىرىپ باستايدى.
ۋرولوگ پاۆەل نيزين نەسەپ-تاس پەن تاعى ءبىر قاۋىپتى اۋرۋ تۋرالى ەسكەرتتى، - دەپ حابارلايدى «يزۆەستيا».
ءزار شىعارۋ جولىنداعى تاستار زات الماسۋدىڭ بۇزىلۋىنان پايدا بولادى. ماماننىڭ ايتۋىنشا، بۇعان ءارتۇرلى فاكتور اسەر ەتەدى، ولار: ينفەكسيالىق ەمەس، جۇقپالى، گەنەتيكالىق جانە دارىلىك. ول اۋرۋدىڭ قاۋىپتى ەكەنىن ءتۇسىندىردى، ويتكەنى ول بۇيرەك جامباسىنان قۋىققا نەسەپ اعىنىن بۇزادى، سالدارىنان اعزا شامادان تىس سوزىلىپ، قاتتى اۋىرادى.
پاۆەل نيزين نەسەپ-تاس اۋرۋى ەشقانداي بەلگى كورسەتپەيتىنىن جەتكىزدى. مۇنىڭ سەبەبى تاس ءزاردىڭ اعۋىنا كەدەرگى كەلتىرمەيتىندەي ەتىپ ورنالاسۋى.
«تاس نەسەپاعار قابىرعاسىن «تىرناۋ» ارقىلى اۋىرسىنۋدى تۋدىرادى دەگەن پىكىر بار، ءبىراق بۇل جاي عانا اڭىز»، - دەدى دارىگەر.
سونىمەن قاتار، ۋرولوگ بۇيرەكتىڭ سوزىلمالى اۋرۋى دا ۇزاق ۋاقىت بويى بىلىنبەۋى مۇمكىن ەكەنىن ەسكەرتتى. الايدا ورگان قىزمەتى بۇزىلا بەرەدى، ياعني قاندى ناشار سۇزەدى، ەلەكتروليت پەن سۋ دەڭگەيىن رەتتەمەيدى جانە تاعى باسقا. دارىگەردىڭ سوزىنشە، ادامدار باستاپقىدا وزگەرىس بايقامايدى، ءبىراق جاعداي ناشارلاعان سايىن بەت ءىسىپ، قان قىسىمى كوتەرىلەدى.
ايتا كەتەيىك، بۇعان دەيىن بۇيرەك قاتەرلى ىسىگىنىڭ 8 بەلگىسى حابارلانعان بولاتىن.
ەڭ ءبىرىنشى بەلگىسى - قان سيۋ (گەماتۋريا). ءزاردىڭ قان ارالاس شىعۋى كۇشەيۋى نەمەسە ازدان كۇننەن سوڭ توقتاۋى دا مۇمكىن. بۇل جاعدايدا بىردەن دارىگەرگە كورىنۋ قاجەت.
كەلەسى بەلگىسىنىڭ ءبىرى - ءبۇيىردىڭ ءىسۋى. ودان كەيىنگى سيمپتومدارى قاتارىنا تابەت تارتپاۋى، سالماق جوعالتۋ، جوعارى تەمپەراتۋرا مەن تەرلەۋ، السىزدىك، مازاسىزدىق جانە ارقاداعى قابىرعا اۋىرۋى جاتادى.
