دارىگەر ءماسىموۆ تۋرالى تىڭ دەرەك ايتتى

استانا. KAZINFORM - ول كىسىنىڭ قۇجاتتارىنىڭ بىرىندە «نايمان» دەپ كورسەتىلگەن ەكەن. بۇل تۋرالى دارىگەر، گيگيەنيست- ەپيدەميولوگ، مەديتسينا عىلىمدارىنىڭ دوكتورى، پروفەسسور اراي تولەمىسوۆا «ادال Adam youtube» ارناسىنا بەرگەن سۇحباتىندا ايتقان ەكەن.

«قاجىمقان ءماسىموۆتى ۇيعىر دەيدى، ول ۇيعىر ەمەس. كومپيۋتەرىندەگى قۇجاتتاردىڭ ءبىرىن وقىپ قالدىم، ول كىسى «نايمان» دەپ جازىلىپ تۇردى. ءوز اۋزىنان تالدىقورعاننىڭ اقسۋىنانمىن، نايمانمىن دەگەنىن دە ەستىدىم. اقسۋدا مەشىت سالدى. سوندا اس بەرگەندە دە بولعانمىن»، - دەيدى اراي تولەمىسوۆا.

شىنىندا ۇ ق ك-نىڭ بۇرىنعى ءتوراعاسى كارىم ءماسىموۆتىڭ ۇلتى، شىققان تەگى جايىندا ءبىراز اڭگىمە بارى راس. كوپشىلىگى ونى قازاق ەمەس، ۇيعىر ۇلتىنان شىققان دەسەدى.

وسى ماسەلەگە ونىڭ اكەسى قاجىمقان قاسىم ۇلى «جاس الاش» گازەتىنە بەرگەن سۇحباتىندا بىلاي دەپ جاۋاپ بەرگەن:

- قاجەكە، سۇراعىم رەتسىزدەۋ بولسا، ايىپ ەتپەڭىز، جالعىز مەن ەمەس، جالپى وقىرمان قاۋىمى دا بىلگىسى كەلەتىنىنە سەنىمدىمىن، ءسىز وسى قاي ۇلتتىڭ وكىلىسىز؟ - قاراعىم، مەن قاراپايىم كوپتىڭ ءبىرى بولىپ جۇرسەم، ەشكىم دە ۇلتىڭ كىم، ۇلىسىڭ كىم دەپ سۇراماس ەدى. وزدەرى سىرتىمنان ءپىشىپ، ۇيعىر قىلىپ جاتقاندارىن دا بىلەمىن. ءبىراق، ءبىز تاشكەندىك قوجالاردىڭ ۇرپاعىمىز. سوناۋ ءبىر اۋمالى-توكپەلى زاماندا تاشكەننەن قۇلجاعا بارامىز دەپ، جەتى ءۇي قوجالار شىققان ەكەن. ىشىندە ءبىزدىڭ دە اۋلەتىمىز بار. اكەم قاسىمنىڭ سول كەزدە ەكى جاستاعى كۇنى ەكەن، ودان ءبىراز ۇلكەن ءاسىم دەگەن اعاسى بولىپتى. وكىنىشكە قاراي، جولدا الدەبىر قاراقشىلاردىڭ قولىنان با، بولماسا باسقا دا جاعداي بولعان با، اكە-شەشەسى بىردەي ءولىپ، اكەم اعاسىمەن ەكەۋى تۇل جەتىم قالادى. كەتىپ بارا جاتقان قوجالار ەكى بالانى سول جەردەگى ءبىر ۇيعىردىڭ قولىنا تاستاپ كەتەدى. ول بىرەۋدىڭ بالاسىنا قاراي ما، اپارىپ ەكەۋىن دە بالالار ۇيىنە تاپسىرادى جانە ءماسىموۆ دەپ ءوزىنىڭ تەگىن بەرىپ كەتىپتى. ايتپەسە، ءبىزدىڭ اتامىزدىڭ اتى-ءجونى ءتىپتى باسقا ەكەنىن كەيىن بىلدىك. اكەمنىڭ اعاسى ءاسىمدى جاسىنىڭ ۇلكەندىگىنە بايلانىستى ەرەسەك بالالار توبىنا اپارىپ قوسسا كەرەك، سودان كەيىن ماڭگىلىككە ءبىر-بىرىنەن كوز جازىپ قالادى. بەرتىن، ەس جيعاسىن سول قۇلجا جاعىنا كوشىپ كەتكەن قوجالاردىڭ تۇقىمدارىن تاۋىپ، ءوزىمىزدىڭ كىم ەكەنىمىز جايلى ءبىراز مالىمەت الدىق. ال شەشەم وسى تالدىقورعان وڭىرىنىكى، نايمان قىزى. ءوزىمنىڭ بايبىشەم ارقا جەرىنىكى، كەرەكۋ- بايان ءوڭىرىنىڭ تۋماسى دەپ وتكەندە ايتتىم. ال شىندىعىندا، ۇيعىرعا قۇدامىز، بالام كارىمنىڭ كەلىنشەگى - ۇيعىر قىزى».

«جاس الاش»، №81. 12-قازان، 2010 -جىل.

ەستەرىڭىزدە بولسا، كارىم ماسىموۆكە قاتىستى سوت ۇكىمى بىلتىر 24-ساۋىردە شىققان بولاتىن. ۇ ق ك بۇرىنعى ءتوراعاسىنىڭ مۇلكى تاركىلەنىپ، مەملەكەتتىك قىزمەتتە لاۋازىمداردى اتقارۋ قۇقىعىنان ءومىر بويىنا ايىرا وتىرىپ، 18 جىلعا سوتتالعان بولاتىن.