دارىگەر ەڭ پايدالى كوكونىستى اتادى
استانا. KAZINFORM - ەڭ پايدالى كوكونىس - بروككولي. بۇل جايلى «گازەتا.Ru»-گە گاستروەنتەرولوگ داريا ۋتيۋموۆا ايتىپ بەردى.
«بۇل ءونىمنىڭ 100 گرامىندا شامامەن س جانە ك دارۋمەنىنىڭ تاۋلىكتىك نورماسى بار. س دارۋمەنى جۇيكە جۇيەسىنىڭ قىزمەتىن رەتتەيدى، سونىمەن قاتار ەندوكريندىك بەزدەردىڭ قىزمەتىن بەلسەندىرەدى. ول سونداي-اق كۇيزەلىسكە توزىمدىلىكتى قالىپتاستىرۋعا قاتىسادى، ويتكەنى ول - كۇشتى انتيوكسيدانت جانە اعزاداعى مەدياتورلار سينتەزىنىڭ رەتتەۋشىسى. انتيوكسيدانتتىق قاسيەتتەرىنە بايلانىستى س دارۋمەنى يممۋندىق جۇيەنىڭ جۇمىسىنا دا كومەكتەسەدى»، - دەيدى گاستروەنتەرولوگ.
ك دارۋمەنى قاننىڭ ۇيۋى جانە سۇيەك ءتىنىن نىعايتۋ ءۇشىن قاجەت - بۇل ولاردىڭ تىعىزدىعىن ارتتىرادى، قاتايتادى جانە وسىلايشا سىنۋ قاۋپىن ازايتادى. سونداي-اق، قىرىققاباتتىڭ بۇل تۇرىندەگى كالتسي مەن ماگني سۇيەك ءتىنىن قالىپتاستىرۋ ءۇشىن قاجەت.
«بروككوليدە جاسۇنىق كوپ، سوندىقتان ول اعزانى قانىقتىرادى جانە اسقازان-ىشەك جولدارىنىڭ جۇمىسىن جاقسارتادى. سونداي-اق بروككولي - ليۋتەيننىڭ كوزى: بۇل وسىمدىك پيگمەنتى كوزدىڭ جانە كاپيلليارلاردىڭ ساۋلىعى ءۇشىن ماڭىزدى. بروككولي قۇرامىندا كورۋ وتكىرلىگىنە جاۋاپ بەرەتىن، كوزدىڭ جارىققا سەزىمتالدىعىن ارتتىراتىن كاروتينويدتار بار. ءدال وسى زاتتار جاس ۇلعايا كەلە كوزدىڭ تور قابىعىن بۇزاتىن بوس راديكالداردىڭ اسەرىن بەيتاراپتاندىرۋعا كومەكتەسەدى»، - دەپ قورىتىندىلادى مامان.
