دارىندى بالالاردىڭ ۇستازدارىنا سىياقى بەرۋ ۇسىنىلدى - زاڭ جوباسى

استانا. KAZINFORM - ەلىمىزدە جارىستاردا وزات بولعان وقۋشىلاردىڭ ۇستازدارىنا ءبىر رەتتىك سىياقى بەرۋدى زاڭداستىرۋ ماسەلەسى قارالىپ جاتىر.

- وتكەن جىلى ءبىز ەڭ بەدەلدى حالىقارالىق عىلىمي بايقاۋلاردىڭ جەڭىمپازدارىنا ۇبت تاپسىرماي-اق مەملەكەتتىك گرانتپەن وقۋعا ءتۇسۋ مۇمكىندىگىن بەرۋ تۋرالى زاڭدى قابىلدادىق. وعان قوسا، «بولاشاق» باعدارلاماسى اياسىندا باكالاۆريات دەڭگەيىندە شەتەلدەردىڭ وزىق ۋنيۆەرسيتەتتەرىنە ءتۇسۋ قۇقىعىن بەردىك. ەندى ءبىز قاراستىرىپ وتىرعان زاڭ جوباسىندا سول دارىندى بالالاردى دايىنداعان ۇستازدارعا ءبىر رەتتىك سىياقى بەرۋ تۋرالى نورما ەنگىزىلىپ وتىر، - دەدى ءماجىلىس دەپۋتاتى اسحات ايماعامبەتوۆ ءماجىلىستىڭ جالپى وتىرىسىندا.

حالىق قالاۋلىسىنىڭ ايتۋىنشا، اتالعان شارا جاستاردىڭ عىلىمي الەۋەتىن دامىتۋعا جانە تالانتتى وقۋشىلاردى ىنتالاندىرۋ ءۇشىن ماڭىزدى.

ايتا كەتەيىك، بۇگىن قازاقستان رەسپۋبليكاسىنىڭ كەيبىر زاڭنامالىق اكتىلەرىنە مادەنيەت جانە ءبىلىم بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءماجىلىستىڭ ءبىرىنشى وقىلىمىندا قارالىپ جاتىر. سونىمەن قاتار زاڭ جوباسىندا وقۋشىلارعا ارنالعان «اقىلمان» كارتاسىن ەنگىزۋ قاراستىرىلعان.

- اقىلمان كارتاسى مەكتەپ وقۋشىلارىنا مادەني ۇيىمدارعا بارۋعا مۇمكىندىك بەرەدى، وسىلايشا ولاردىڭ ەلدىڭ مادەني ومىرىنە ارالاسۋ دەڭگەيىن ارتتىرادى. مۇنداي باستامالاردىڭ شەتەلدىك تاجىريبەدە ءساتتى جۇزەگە اسىرىلىپ جاتقانىن اتاپ وتكەن ءجون. مىسالى، فرانسيا، گەرمانيا، يتاليا، يسپانيا سياقتى ەلدەردە وسىنداي كارتالارمەن وقۋشىلار مۋزەيلەرگە، تەاترلارعا، كورمەلەرگە جانە باسقا دا مادەني نىساندارعا جەڭىلدەتىلگەن تۇردە بارۋ مۇمكىندىگىن، - دەيدى ا. ايماعامبەتوۆ.