دارىندى بالا بولدى. مۇعالىمدەر ۇشاق اپاتىنان كوز جۇمعان وقۋشى تۋرالى ايتتى

استانا. KAZINFORM - اقتاۋ ىرگەسىندەگى ۇشاق اپاتىنان 11 جاسار ەلدار جۇماعات پەن ونىڭ اناسى قازا تاپقان ەدى.

مۇعالىمدەردىڭ ايتۋىنشا، ەلدار - دارىندى، مەيىرىمدى، ءارى ەڭبەكقور بالا بولعان.

- جاڭا عانا اۋە اپاتى سالدارىنان قازا تاپقاندار تۋرالى تىڭ دەرەكتەر بەلگىلى بولدى. ولاردىڭ اراسىندا 11 جاسار ەلدار جۇماعات پەن ونىڭ اناسى دا بار. مۇعالىمدەردىڭ ايتۋىنشا، ەلدار - دارىندى، مەيىرىمدى، ءارى ەڭبەكقور بالا بولعان. ول بارلىق تانىستارىنىڭ جۇرەگىندە جارقىن ءىز قالدىردى. وقۋ-اعارتۋ مينيسترلىگى قازا بولعانداردىڭ وتباسىنا كوڭىل ايتىپ، ولاردىڭ قايعىسىنا ورتاقتاسادى، - دەلىنگەن حابارلامادا.

ەسكە سالساق، ازەربايجان ەلورداسى باكۋدەن رەسەيدىڭ گروزنىي قالاسىنا باعىت العان اۋە كەمەسى قازاقستان اۋماعىندا اپاتقا ۇشىرادى.

بۇعان دەيىن ەلىمىزدىڭ توتەنشە جاعدايلار مينيسترلىگى اقتاۋ قالاسى ماڭىنداعى اۋە اپاتىنان مەرت بولعان وتانداستارىمىزدىڭ اتى-ءجونىن جاريالادى.

ۇكىمەت باسشىسىنىڭ ورىنباسارى قانات بوزىمبايەۆ ۇشاقتىڭ قيراندىسى ارقىلى اپاتتىڭ سەبەپ-سالدارى انىقتالاتىنىن ايتقان ەدى.

سونداي-اق، ۇشاق اپاتىنان قازا تاپقان قازاقستاندىقتاردىڭ وتباسىلارىنا قارجىلاي كومەك كورسەتىلەتىنى ايتىلدى.

اۆتور

اينۇر تۋماكبايەۆا