دانيال احمەتوۆ قىزمەتىنەن كەتتى

استانا. KAZINFORM - تۋريزم جانە سپورت ءمينيسترى ەربول مىرزابوسىنوۆتىڭ قاتىسۋىمەن قازاقستان جەڭىل اتلەتيكا فەدەراتسياسىنىڭ 2024 -جىلدى قورىتىندىلاۋ جيىنى ءوتتى.

اتالعان ۆەدومستۆو تاراتقان مالىمەتكە سايكەس، ءىس- شاراعا جەڭىل اتلەتيكا فەدەراتسياسىنىڭ پرەزيدەنتى دانيال احمەتوۆ، وبلىستىق فەدەراتسيانىڭ باسشىلارى، سپورتشىلار مەن فەدەراتسيا وكىلدەرى قاتىستى.

جيىندا دانيال احمەتوۆ فەدەراتسيانىڭ اتقارعان جۇمىسى تۋرالى ەسەپ بەرىپ، سپورتتاعى ءبىرقاتار ماڭىزدى جەتىستىگىن اتاپ ءوتتى. ونىڭ ىشىندە حالىقارالىق جارىستاردا قازاقستان اتلەتتەرى كورسەتكەن جوعارى ناتيجەلەر مەن جەڭىستەر، سونداي- اق جەڭىل اتلەتيكانىڭ دامۋىنا باعىتتالعان جاڭا باستامالار ايتىلدى.

وتىرىستا دانيال احمەتوۆ قىزمەتىن مەرزىمىنەن بۇرىن توقتاتاتىنىن مالىمدەپ، فەدەراتسيا پرەزيدەنتتىگىنە داڭقتى جەڭىل اتلەت، ريو وليمپياداسىنىڭ چەمپيونى ولگا رىپاكوۆانىڭ كانديداتۋراسىن ۇسىندى. جيىنعا قاتىسۋشىلار، سونىڭ ىشىندە وبلىس فەدەراتسيالارىنىڭ باسشىلىعى مەن سپورت قاۋىمداستىعى و. رىپاكوۆانىڭ كانديداتۋراسىن ءبىراۋىزدان قولدادى.

مينيستر ەربول مىرزابوسىنوۆ جەڭىل اتلەتيكا فەدەراتسياسىن بىرنەشە جىل باسقارعان دانيال احمەتوۆكە جەمىستى قىزمەتى ءۇشىن العىس ءبىلدىرىپ، پرەزيدەنتتىككە تاعايىندالعان ولگا رىپاكوۆانىڭ قىزمەتىنە ساتتىلىك تىلەدى.

- جەڭىل اتلەتيكا - ەلدەگى ەڭ تانىمال سپورت تۇرلەرىنىڭ ءبىرى. قازىرگى تاڭدا 360 مىڭنان استام وتانداسىمىز ءدال وسى سپورت تۇرىمەن كاسىبي تۇردە اينالىسادى. سوندىقتان ءبىز بۇل سپورتتى جاڭا دەڭگەيگە كوتەرىپ، ونىڭ حالىقارالىق ارەنادا تانىمالدىلىعىن ارتتىرۋىمىز قاجەت. بۇگىنگى جيىندا فەدەراتسيانىڭ جۇمىسىنا قاتىستى ماڭىزدى وزگەرىستەر بولىپ جاتىر. فەدەراتسيانى بىرنەشە جىل باسقارعان دانيال احمەتوۆ قىزمەتىنەن كەتىپ جاتىر. وعان اتقارعان جۇمىسى ءۇشىن العىس بىلدىرەمىن. دانيال كەنجەتاي ۇلىنىڭ باسشىلىعىمەن ءبىزدىڭ اتلەتتەر حالىقارالىق جارىستاردا ۇلكەن جەتىستىكتەرگە جەتتى. ەندى فەدەراتسيا پرەزيدەنتتىگىنە وليمپيادا چەمپيونى ولگا رىپاكوۆا كەلىپ وتىر. ولگا سەرگەيەۆنانىڭ وتاندىق جەڭىل اتلەتيكانىڭ دامۋىنا قوسقان ۇلەسى مول. الداعى ۋاقىتتا دا ەلىمىزدىڭ جەڭىل اتلەتيكا سپورتىن بيىكتەرگە كوتەرەدى دەپ سەنەمىز، - دەپ اتاپ ءوتتى ەربول مىرزابوسىنوۆ.

جيىن سوڭىندا مينيستر ولگا رىپاكوۆاعا ەلىمىزدەگى جەڭىل اتلەتيكا سپورتىنىڭ حالىقارالىق دەڭگەيدەگى ىنتىماقتاستىعىن ارتتىرۋ، سپورتشىلاردىڭ دايىندىعىنا جانە رەزەرۆتى دايارلاۋعا ەرەكشە كوڭىل ءبولۋ قاجەتتىگىن تاپسىردى.