دامۋ بالا: 81 كاسىپكەردەن 55 ميلليون تەڭگەدەن استام قاراجات العان ادامعا قاتىستى تەرگەۋ باستالدى
استانا. KAZINFORM - قارجىلىق مونيتورينگ اگەنتتىگى قىزىلوردا وبلىسىندا بىرنەشە قوعامدىق ۇيىم مۇشەسىنە الاياقتىق فاكتىسى بويىنشا سوتقا دەيىنگى تەرگەپ تەكسەرۋدى باستادى، دەپ حابارلايدى ق ر قارجىلىق مونيتورينگ اگەنتتىگىنىڭ باسپا ءسوز قىزمەتىنە سىلتەمە جاساپ.
ول «دامۋ بالا» پلاتفورماسى ارقىلى قىزمەت كورسەتەتىن كاسىپكەرلىك سۋبەكتىلەرىنە قويىلاتىن تالاپتارعا سايكەستىگىن تەكسەرۋ اكتىلەرىنەن، بالالار شىعارماشىلىعى جانە سپورت سالاسىندا انىقتالعان بۇزۋشىلىقتاردى الىپ تاستاۋ ءۇشىن 81 كاسىپكەرلىك سۋبەكتىسىنەن ءوزىنىڭ سەنىمدى تۇلعالارى ارقىلى 55 ميلليون تەڭگەدەن استام قاراجات العان دەپ كۇدىكتەلۋدە.
سپورتتىق جابدىقتاردىڭ تالاپتارعا سايكەس كەلمەۋى، بالالاردىڭ كەلۋىن ەسەپكە الۋدىڭ بۇزىلۋى، بەينەباقىلاۋ جۇيەلەرىنىڭ تولىق سايكەس كەلمەۋى جانە سپورت سەكتسيالارىنا باراتىن بالالاردىڭ قاۋىپسىزدىگىن قامتاماسىز ەتۋ جانە باسقا دا بۇزۋشىلىقتار انىقتالدى.
اتالعان فاكت بويىنشا تەرگەۋ جۇرگىزىلۋدە.
سوتپەن كۇدىكتىگە قاتىستى ءۇيقاماق تۇرىندەگى بۇلتارتپاۋ شاراسى تاعايىندالدى.
وزگە مالىمەتتەر ق ر ق پ ك- ءنىڭ 201-بابىنا سايكەس جاريا ەتىلۋگە جاتپايدى.
ق ر كونستيتۋتسياسىنىڭ 77-بابى 3-تارماعىنىڭ 1-تارماقشاسىنا جانە ق ر قىلمىستىق ءىس جۇرگىزۋ كودەكسىنىڭ 19-بابى 1-بولىگىنە سايكەس قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءارقايسىسى كىناسىز دەپ ەسەپتەلەدى.
