داۋلەت تۇرلىحانوۆتىڭ ۇلىن ۋاقتىلى ەسەپكە قويماعان ق ا ج كوميتەتى قىزمەتكەرلەرى جاۋاپقا تارتىلدى

استانا. KAZINFORM - ءماجىلىس دەپۋتاتى داۋلەت تۇرلىحانوۆتىڭ ۇلى نۇراسىل بولاتتى پروباتسيا قىزمەتىنە ۋاقتىلى تىركەمەگەن قىلمىستىق- اتقارۋ جۇيەسى كوميتەتىنىڭ قىزمەتكەرلەرىن تارتىپتىك جاۋاپقا تارتتى. بۇل تۋرالى اتالعان كوميتەتتىڭ باسپا ءسوز قىزمەتى حابارلايدى.

«پروتسەستىك ءتارتىپتى بۇزعانى ءۇشىن ءبىرقاتار كىنالى تۇلعا تارتىپتىك جاۋاپكەرشىلىككە تارتىلدى»، - دەيدى قىلمىستىق-اتقارۋ جۇيەسى كوميتەتىنەن.

ايتا كەتسەك، تاياۋدا الەۋمەتتىك جەلىدە ءماجىلىس دەپۋتاتى داۋلەت تۇرلىحانوۆتىڭ بوستاندىعى شەكتەلگەن ۇلى نۇراسىل بولاتتىڭ تۇنگى ۋاقىتتا ەمىن-ەركىن جۇرگەن ۆيدەوسى تاراعان ەدى.

ءىستىڭ ءمان-جايىن قىلمىستىق-اتقارۋ جۇيەسى كوميتەتىنەن سۇراعانىمىزدا: «ن. بولاتقا قاتىستى ۇكىمدى ورىنداۋ پروباتسيا قىزمەتىنە (تىركەلگەن مەكەنجايى بويىنشا) بيىل 14-تامىزدا كەلىپ ءتۇستى. زاڭناماعا سايكەس پروباتسيالىق باقىلاۋ سوتتالعان ادامدى ەسەپكە العان ساتتەن باستاپ جۇزەگە اسىرىلادى»، - دەگەن جاۋاپ الدىق.

ەسكە سالا كەتەيىك، 2023 -جىلى اقپاندا نۇراسىل بولات الماتىدا زاڭگەر اننا دميتريەۆيچ پەن ونىڭ كۇيەۋى ولەگ چەرنوۆتى سوققىعا جىققان ەدى.

كەيىن سپورت قايراتكەرى داۋلەت تۇرلىحانوۆ بالاسىنىڭ بۇزاقىلىق ارەكەتىنە بايلانىستى پىكىر ءبىلدىردى.

ودان بولەك، داۋلەت تۇرلىحانوۆ ۇلىنىڭ ىسىنە ارالاسپايتىنىن ايتتى.

ال، وتكەن جىلى 2-شىلدە كۇنى ول مەرزىمدى اسكەري بورىشىن وتەپ جاتقان جەرى - قونايەۆ گارنيزونى اسكەري بولىمدەرىنىڭ بىرىنەن قاشىپ كەتكەن بولاتىن.

كەيىن كوپ وتپەي تابىلىپ، قىزمەت اتقاراتىن ورنىنا جەتكىزىلدى.

الماتى گارنيزونى ءبولىم باستىعىنىڭ بۇيرىعىنا باعىنباعانى جانە ورىنداماعانى ءۇشىن اكىمشىلىك جاۋاپكەرشىلىككە تارتىلدى.

2023 -جىلى 9-قازاندا داۋلەت تۇرلىحانوۆتىڭ ۇلىنا سوت ۇكىمى شىقتى.

پروكۋرور سوتتالۋشى ب-عا 1 جىل 6 اي باس بوستاندىعىن شەكتەۋ تۇرىندە جازا تاعايىنداۋدى سۇرادى.

بيىل مامىردا جوعارعى سوت داۋلەت تۇرلىحانوۆتىڭ ۇلىنا كەسىلگەن ۇكىمدى وزگەرتتى.

سودان سوڭ داۋلەت تۇرلىحانوۆ ۇلىنىڭ سوت ۇكىمىنە قاتىستى پىكىر ءبىلدىردى.

اۆتور
داۋلەت ىزتىلەۋ