داۋلەت تۇرلىحانوۆ ەلىمىزدە سپورت سالاسىندا قانداي كەمشىلىكتەر بار ەكەنىن ايتتى
استانا. KAZINFORM - بۇگىن ءماجىلىستىڭ جالپى وتىرىسىندا دەپۋتات داۋلەت تۇرلىحانوۆ ەلىمىزدەگى سپورتتى دامىتۋعا قاتىستى ۇسىنىستارىن جاريالادى.
«پاريجدە وتكەن وليمپيادانىڭ ناتيجەلەرى قازاقستاندىق سپورتتاعى ەلەۋلى پروبلەمالاردى كورسەتتى. جالپى، جاستار اراسىندا ءبىلىم بەرۋ مەكەمەلەرىندە دەنە شىنىقتىرۋ جانە سپورتپەن شۇعىلدانۋعا ارنالعان ماتەريالدىق-تەحنيكالىق بازانىڭ السىزدىگى بايقالىپ وتىر. بۇل جاعداي بۇقارالىق سپورتتى دامىتۋ مۇمكىندىگىن شەكتەيدى. وقۋ ورىندارى اكىمشىلىگى جاعىنان ستۋدەنتتىك سپورتتى دامىتۋعا جانە جاستاردىڭ جارىستارعا قاتىسۋىنا موتيۆاتسيا تومەن دەڭگەيدە. اسىرەسە، جاستار اراسىندا سالاۋاتتى ءومىر سالتىن ناسيحاتتاۋ جەتكىلىكسىز. بالالارمەن جانە جاستارمەن جۇمىس ىستەيتىن بىلىكتى ماماندار مەن جاتتىقتىرۋشىلار تاپشى. وڭىرلىك دەڭگەيدەن باستاپ سپورتتاعى جوعارى جەتىستىكتەر ساباقتاستىعىنىڭ ءالسىز جۇيەسىن دە اتاپ وتكەن ءجون. مۇنىمەن قوسا، وڭىرلەردە وليمپيادالىق سپورت تۇرلەرىن دامىتۋدىڭ تومەن دەڭگەيى كورىنىپ تۇر»، - دەدى د. تۇرلىحانوۆ پرەمەر-مينيستر ولجاس بەكتەنوۆتىڭ اتىنا جولداعان ساۋالىندا.
ونىڭ پايىمىنشا، بۇل سالاعا قوماقتى قاراجات بولىنگەنىنە قاراماستان، بۇل شىعىنداردىڭ تيىمدىلىگى تومەن. وسى ورايدا بۇل جاعدايدى جاقسارتۋ ءۇشىن كەلەسى شارالاردى قابىلداۋ ۇسىنىلدى:
- سپورتتىق ءىس-شارالاردى قارجىلاندىرۋ پروتسەستەرىن تولىعىمەن سيفرلاندىرۋ جانە قاراجاتتىڭ ماقساتتى پايدالانىلۋىنا ونلاين-باقىلاۋ جۇيەسىن ەنگىزۋ؛
- شەتەلدىك تاجىريبەنى قولدانا وتىرىپ، سپورتتىق ءىس-شارالاردى جوسپارلاۋدىڭ زاماناۋي ادىستەرىن قولدانۋدى قولعا الۋ؛
- جاس سپورتشىلار مەن ولاردىڭ جاتتىقتىرۋشىلارىن، اسىرەسە حالىقارالىق جارىستاردا جوعارى ناتيجەلەرگە قول جەتكىزەتىندەر ءۇشىن كوتەرمەلەۋ جۇيەسىن كۇشەيتۋ؛
- سپورت نىساندارىن باسقارۋدا مەملەكەتتىك-جەكەشەلىك ارىپتەستىكتى دامىتۋ.
«قازاقستاندىق سپورتقا ماڭىزدى رەفورمالار قاجەت. سپورتتى دامىتۋدىڭ 2025-2028-جىلدارعا ارنالعان باعدارلاماسىن جانە 2032-جىلعا دەيىنگى دامۋ ستراتەگياسىن بەكىتۋدى ۇسىنامىز»، - دەدى دەپۋتات.
