دالاسى - داستان. تىلەۋى - اشىق اسپان. بىرلىگى جاراسقان - قازاقستان
استانا. KAZINFORM - بۇگىن - قازاقستان حالقىنىڭ بىرلىگى كۇنى. سوناۋ 1996 -جىلدان باستاپ ءداستۇرلى تۇردە تويلانىپ كەلە جاتقان مەرەكە. بەرەكە مەن بىرلىك جايلاعان جايلى مەكەنگە قونىستانعان ءتۇرلى ۇلت پەن ۇلىس وكىلدەرىنىڭ ىنتىماعى ارتا تۇسەتىن كۇن.
كوپتەگەن ۇلتتىڭ شاتتىق تولى شاڭىراعىنا اينالعان قازاقستان جەر جاھانعا بەيبىتشىلىكتىڭ وزىق ۇلگىسىن تانىتىپ وتىر. تىلىنە، تۇرىنە، دىلىنە، دىنىنە قاراماستان سىيلاستىقتا ءومىر ءسۇرىپ جاتقان قازاقستاندىقتار تەك مەرەكەدە عانا ەمەس، ءار كۇن سايىن تاتۋلىقتىڭ تۋىن جىقپاي، بىرلىكتى باعالايتىنى بايقالادى. ول بەكەر ەمەس.
كەيىنگى جىلدارى الەمدە گەوساياسي احۋال كۇردەلەنىپ، قارۋلى قاقتىعىستار تىيىلماي تۇر. اۋمالى‑توكپەلى كەزەڭدى باستان كەشىرۋ، جىلدار بويىنا جالعاساتىن ءدىنارالىق، ۇلتارالىق شيەلەنىستەر زاردابى وراسان بولادى. سالدارىن كورىپ ءجۇرمىز. بەيكۇنا سابيلەر، بەيبىت تۇرعىندار قازا تاۋىپ جاتىر. وسىندايدا قاريالاردىڭ «ەلىمىز امان، جۇرتىمىز تىنىش بولسىن» دەگەن باتاسىنىڭ ءمانى تەرەڭدە جاتقانىن اڭعارۋعا بولادى.
جالپى، بىرلىك دەگەن ۇعىمدى ۇلتتار اراسىنداعى قاتىناسقا عانا قولدانۋعا بولماس. الىستان مىسال ىزدەپ كەرەك ەمەس. مىنە، ەلىمىزدىڭ ءبىرقاتار ايماعى سۋ تاسقىنىنان زارداپ شەككەندە قازاقستاندىقتار ءوزارا ۇيىمداسىپ، گۋمانيتارلىق كومەك جيناي باستادى. ءتىپتى، ءار اۋىلدان توپتاسقان ەر ازاماتتار الىس جولعا شىعىپ، سۋ تاسقىنىنىڭ الدىن الۋ شارالارىنا اتسالىستى. بۇل بىرلىك ەمەي نەمەنە؟!
ەلىمىزدىڭ كوپتەگەن وڭىرىندە توتەنشە جاعداي رەجيمى ەنگىزىلگەننەن بەرى ەرىكتىلەر دە اياعىنان تىك تۇردى. ۆولونتەرلەر تۇرعىنداردى ەۆاكۋاتسيالاۋعا اتسالىسىپ، قۇتقارىلعان ادامدارعا العاشقى مەديتسينالىق، پسيحولوگيالىق كومەك كورسەتتى. گۋمانيتارلىق كومەكتى جيناپ سۇرىپتاپ، ءتيىستى جەرگە جونەلتتى. ارىق قازىپ، بوگەتتەردى نىعايتتى. قاجەت بولعان جاعدايدا قۇتقارۋشىلار مەن اسكەري قۇرىلىم قىزمەتكەرلەرىنە ىستىق تاماق ۇيىمداستىردى. وسى ۋاقىتقا دەيىن ۆولونتەرلەر شامامەن 9903 توننا گۋمانيتارلىق كومەك جيناپ ۇلگەرگەن ەكەن. بۇل بىرلىك ەمەي نەمەنە؟!
سۋ تاسقىنىنا قارۋلى كۇشتەردىڭ جەكە قۇرامى دا تارتىلعانى بەلگىلى. كۇنى-ءتۇنى اۋىر جۇمىستاردى اتقارىپ جۇرگەن دە سولار. كەز كەلگەن توتەنشە جاعدايدا اسكەريلەردىڭ جۇمىلدىرىلۋى زاڭدىلىق بولسا دا، بەينەجازبالاردان، سۋرەتتەردەن جاس ساربازداردىڭ سۋعا بەلشەدەن كىرىپ، جانقيارلىقپەن كۇرەسىپ جۇرگەنىن اڭعارۋعا بولادى. توتەنشە جاعدايلار مينيسترلىگىنىڭ قىزمەتكەرلەرى دە مىندەتىن ءمىنسىز ورىنداپ، حالىقتىڭ العىسىنا بولەنىپ جاتىر. جالپى، كەز كەلگەن كۇشتىك قۇرىلىم ماماندارى جۇرتشىلىقپەن بىرگە تىنىستاپ، قىسىلتاياڭ كەزەڭدە قولداۋ كورسەتتى. انشەيىندە قۇقىق قورعاۋ ورگاندارىن جاقتىرا بەرمەيتىن كەيبىر ادامدار ەل باسىنا كۇن تۋعاندا حالىقپەن بىرگە بولعان شەندى ازاماتتارعا العىسى شەكسىز شىعار؟! ءيا، مىڭداعان كۇشتىك قۇرىلىم وكىلى وتباسىنان جىراق كەتىپ، سۋ تاسقىنىنىڭ الدىن الۋعا اتسالىسىپ ءجۇر. بۇل بىرلىك ەمەي نەمەنە؟!
بىرلىگى جوق ەلدىڭ تىرلىگى ونبەيتىنى ايدان انىق. تاتۋلىقتى تۋ ەتكەن ەلدىڭ دامۋدىڭ داڭعىل جولىنا ءتۇسىپ، كوشباسشىعا اينالاتىنىن الەمدەگى وقيعالار دالەلدەپ بەردى. ەندەشە، قۋاتتى قازاقستاننىڭ ءار تۇرعىنى بەيبىتشىلىكتىڭ ءقادىرىن ءتۇسىنىپ، «ىرىس الدى - ىنتىماق» دەگەن ۇستانىمدى ۇمىتپاۋعا ءتيىس.
