داۋلاردىڭ جەكەلەگەن ساناتتارى ازاماتتىق-پروتسەستىك كودەكستەن اكىمشىلىك راسىمدىك قۇجاتقا اۋىستىرىلادى

استانا. KAZINFORM - بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اكىمشىلىك ادىلەت سالاسىن جەتىلدىرۋ جانە كەڭەيتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.

«2021 -جىلعى 1-شىلدەدە مەملەكەتتىك ورگاندار مەن جەكە تۇلعالاردىڭ ءوزارا ءىس-قيمىل تاسىلدەرىن تۇبەگەيلى وزگەرتكەن اكىمشىلىك راسىمدىك- پروتسەستىك كودەكس (ا ر پ ك) قولدانىسقا ەنگىزىلدى. وسى كودەكس قولدانىسقا ەنگىزىلگەننەن كەزدەن باستاپ، ەرەجەلەردىڭ تيىمدىلىگى اكىمشىلىك سوتتاردا داۋلاردى قاراۋ تاجىريبەسىندە كورىندى. سونىمەن قاتار، قۇقىق قولدانۋ پراكتيكاسى ا ر پ ك-نىڭ پروتسەدۋرالىق جانە پروتسەستىك بولىكتەرىن ودان ءارى جەتىلدىرۋ قاجەت ەكەندىگىن كورسەتتى. 2022 -جىلعى 1-قىركۇيەكتەگى مەملەكەت باسشىسى قازاقستان حالقىنا «ادىلەتتى مەملەكەت. ءبىرتۇتاس ۇلت. بەرەكەلى قوعام» جولداۋىندا اكىمشىلىك ادىلەت سالاسىن ودان ءارى كەڭەيتۋ قاجەتتىگىن اتاپ ءوتتى. ادىلەت مينيسترلىگى ۇكىمەت الدىنا قويىلعان مىندەتتەر اياسىندا قارالىپ وتىرعان زاڭ جوباسىندا كورسەتىلگەن بەلگىلى ءبىر باعىتتاردى ازىرلەدى»، - دەدى ادىلەت ءمينيسترى ازامات ەسقارايەۆ.

زاڭ جوباسى مىناداي نەگىزگى باعىتتار ەسكەرىلگەن:

ءبىرىنشىسى - جاريا- قۇقىقتىق داۋلاردىڭ جەكەلەگەن ساناتتارىن ازاماتتىق پروتسەستىك كودەكسىنەن اكىمشىلىك ادىلەت اياسىنا كوشىرۋ. ولارعا «نورماتيۆتىك قۇقىقتىق اكتىنىڭ زاڭدىلىعىن داۋلاۋ تۋرالى ىستەر بويىنشا ءىس جۇرگىزۋ» ا پ ك-نىڭ 30-تاراۋى جانە «ازاماتتىق حال اكتىلەرى جازبالارىنىڭ دۇرىس ەمەستىگىن انىقتاۋ تۋرالى ىستەر بويىنشا ءىس جۇرگىزۋ» ا پ ك-نىڭ 44-تاراۋى جاتادى.

ەكىنشىسى - ۇكىمەتكە مەملەكەتتىك ورگاندار جانە مەملەكەتتىك ورگاندار مەن مەملەكەتتىك ۇيىمدار اراسىنداعى زاڭنامالىق نورمالاردى ءتۇسىندىرۋ جونىندەگى داۋلاردى شەشۋ جونىندەگى وكىلەتتىكتەردى بەكىتۋ. ادىلەت مينيسترلىگى مەملەكەتتىك ورگانداردىڭ، مەملەكەتتىك ورگاندار مەن مەملەكەتتىك ۇيىمدار اراسىنداعى داۋلاردى ا ر پ ك ەرەجەلەرى (داۋلاردى سوتقا دەيىن رەتتەۋ) جانە ۇكىمەت رەگلامەنتىنىڭ ەرەجەلەرى بويىنشا قارالاتىن ءتاسىلدى ازىرلەدى.

ءۇشىنشىسى - اكىمشىلىك راسىمدەر تۋرالى زاڭنامانىڭ جەكەلەگەن نورمالارىن ودان ءارى تۇزەتۋ، سونداي-اق ا ر پ ك-كە ءتيىستى وزگەرىستەر مەن تولىقتىرۋلار ەنگىزۋ.

«مەملەكەت باسشىسى قازاقستان حالقىنا جولداۋىندا ۇكىمەتكە مەملەكەتتىك ورگاندار، مەملەكەتتىك ورگاندار مەن مەملەكەتتىك ۇيىمدار اراسىنداعى داۋلاردىڭ شەشۋ جونىندەگى وكىلەتتىكتەردى بەكىتۋ قاجەت ەكەنىن دە اتاپ ءوتتى. وسىلايشا، ادىلەتمينى مەملەكەتتىك ورگاندار، مەملەكەتتىك ورگاندار مەن مەملەكەتتىك ۇيىمدار اراسىنداعى داۋلاردىڭ ارپك ەرەجەلەرى (داۋلاردى سوتقا دەيىن رەتتەۋ) جانە ۇكىمەت رەگلامەنتىنىڭ ەرەجەلەرى بويىنشا قارالۋ ءتاسىلىن ازىرلەدى. ماسەلەن، ەگەر ءبىر مەملەكەتتىك ورگان باسقا مەملەكەتتىك ورگاننىڭ شەشىمىمەن كەلىسپەسە، وندا ول جوعارى تۇرعان مەملەكەتتىك ورگانعا اكىمشىلىك شاعىممەن جۇگىنۋگە قۇقىلى جانە تيىسىنشە جوعارى تۇرعان مەملەكەتتىك ورگاننىڭ شەشىمىمەن كەلىسپەگەن جاعدايدا، ول ۇكىمەت اپپاراتىنا جۇگىنۋگە قۇقىلى بولادى»، - دەدى مينيستر.