د د س ۇ مايمىل شەشەگىنە قارسى ەكىنشى ۆاكسينانى ماقۇلدادى

استانا. KAZINFORM - دۇنيەجۇزىلىك دەنساۋلىق ساقتاۋ ۇيىمى مايمىل شەشەگى (mpox) ۆيرۋسىنا قارسى ەكىنشى ۆاكسينانى ماقۇلدادى. ونى بالالارعا دا قولدانۋعا بولادى.

بۇل ۆاكسينانى جاپونيالىق «KM Biologics» كومپانياسى جاساعان جانە «LC16m8» دەپ اتالادى. بۇل تۋرالى Uza.uz حابارلادى.

2024-جىلدىڭ قىركۇيەگىندە پايدالانۋعا رۇقسات ەتىلگەن دانيالىق «Bavarian Nordic A/S» كومپانياسىنا تيەسىلى «MVA-BN» ءبىرىنشى ۆاكسيناسى 18 جاستان اسقان ادامدارعا قولدانۋعا ارنالعان ەدى.

جاپونيادا شىعارىلعان جاڭا ۆاكسينانى ەرەسەكتەر عانا ەمەس، توتەنشە جاعدايدا ءبىر جاستان اسقان بالالار دا قابىلداي الادى.

دۇنيەجۇزىلىك دەنساۋلىق ساقتاۋ ۇيىمىنىڭ مالىمدەمەسىندە جاپونيا ۇكىمەتى مايمىل شەشەگى ءورشىپ تۇرعان كونگو دەموكراتيالىق رەسپۋبليكاسىنا كوممەرتسيالىق ەمەس كومەك رەتىندە وسى ۆاكسينانىڭ 3 ميلليون دوزاسىن جەتكىزۋگە شەشىم قابىلداعانى ايتىلعان.

قىركۇيەكتە mpox ينفەكسياسىن جۇقتىرعاندار سانى رەكوردتىق كورسەتكىشكە جەتىپ، 2763 جاڭا جاعداي تىركەلگەن. انىقتالعان ناۋقاستاردىڭ كوپشىلىگى - افريكا ايماعىنىڭ تۇرعىندارى.

ايتا كەتەيىك، قازان ايىندا افريكادا mpoх ۆيرۋسىنا قاتىستى 35 مىڭنان استام جاعداي انىقتالدى. سونىمەن قاتار بۇل ۆيرۋستان 1000نان اسا ادام كوز جۇمدى.