ءۇيىڭىز سۋ تاسقىنى سالدارىنان سۋعا كەتسە، نە ىستەۋ كەرەك؟ زاڭگەر كەڭەسى

استانا. KAZINFORM - قازىر ەلدە سۋ تاسقىنى ماسەلەسى ىرىق بەرمەي تۇر. ءتىلسىز جاۋعا توتەپ بەرۋ قيىنعا سوعىپ جاتىر. كوپتەگەن اۋىل تۇرعىندارىنىڭ ۇيلەرى سۋعا كەتتى. سۋ تاسقىنى سالدارىنان ءۇيىڭىزدى سۋ باسسا، قانداي كومەك الا الاسىز؟

بۇل سۇراققا زاڭگەر دۋمان كوپبايەۆ جاۋاپ بەردى، - دەپ حابارلايدى Massaget.kz ءتىلشىسى.

مامان مۇنداي جاعدايدا ءبىرجولعى الەۋمەتتىك كومەك كورسەتىلەتىنىن ايتتى.

«الەۋمەتتىك كومەك كورسەتۋ بويىنشا 50 ا ە ك مولشەرىندە ءبىرجولعى الەۋمەتتىك كومەك كورسەتىلەدى، بۇل 184600 تەڭگەگە تەڭ. ول ءۇشىن اكىمدىككە نەمەسە اۋىلدىق وكرۋگ اكىمىنە كەلتىرىلگەن زالال فاكتىسىن راستايتىن وتىنىشپەن جانە قۇجاتتارمەن (ت ج ورگاندارىنىڭ انىقتاماسىمەن) جۇگىنۋ قاجەت»، - دەيدى زاڭگەر.

زاڭگەر سونداي-اق زارداپ شەككەندەرگە جەرگىلىكتى بيۋجەت قاراجاتىنان تولەمدەر كورسەتىلەتىنىن ەسكەرتتى.

«جىلجىمايتىن مۇلىككە (ۇيگە، عيماراتقا)، جىلجىمالى مۇلىككە (اۆتوكولىككە، اۋىل شارۋاشىلىعى تەحنيكاسىنا جانە ت. ب.)، مالعا جانە ت. ب. زالال تۋىنداعان كەزدە زارداپ شەككەندەرگە جەرگىلىكتى بيۋجەت قاراجاتى ەسەبىنەن تولەمدەر كورسەتىلەتىن بولادى. ول ءۇشىن جەرگىلىكتى اكىمدىكتەرگە وتىنىشپەن جۇگىنىپ، جوعالعان مۇلىكتىڭ تىزبەسىن جانە مەنشىك قۇقىعىن تىركەۋ تۋرالى راستايتىن قۇجاتتاردى قوسا بەرۋ قاجەت. مال بويىنشا ا ج ت (اۋىل شارۋاشىلىعى جانۋارلارىن تىركەۋ) جۇيەسىندە تىركەۋ قاجەت. زالالدىڭ مولشەرىن جەرگىلىكتى اتقارۋشى ورگاندار تاۋەلسىز ساراپتاما جۇرگىزۋ ارقىلى ايقىندايدى»، - دەيدى دۋمان كوپبايەۆ.

ءورت نەمەسە دۇلەي ءزىلزالا سالدارىنان زارداپ شەككەن ازاماتتارعا جوعالعان، بۇلىنگەن، مۇلىككە ەلەۋلى زالال كەلتىرىلگەن كەزدە وتباسىنا الەۋمەتتىك كومەك كورسەتۋ زاڭ بويىنشا قاراستىرىلعان. كومەك الۋعا قويىلاتىن تالاپتار: تابيعي ءزىلزالا نەمەسە ءورت سالدارىنان ازاماتقا (وتباسىنا) نە ونىڭ مۇلكىنە زيان كەلتىرۋ.

الەۋمەتتىك كومەك الۋ ءۇشىن قالانىڭ، اۋداننىڭ حالىقتى الەۋمەتتىك قورعاۋ جونىندەگى اتقارۋشى ورگانىنا نەمەسە تۇرعىلىقتى جەرى بويىنشا اۋىل، اۋىلدىق وكرۋگ اكىمىنە مىناداي قۇجاتتارمەن جۇگىنۋ قاجەت:

جەكە باسىن كۋالاندىراتىن قۇجات؛

ادامنىڭ (وتباسى مۇشەلەرىنىڭ) تابىستارى تۋرالى مالىمەتتەر؛

تابيعي ءزىلزالا نەمەسە ءورت سالدارىنان ازاماتقا (وتباسىنا) نە ونىڭ مۇلكىنە كەلتىرىلگەن

زالال فاكىسىن راستايتىن قۇجاتتار.

ەسكە سالايىق، ەلىمىزدىڭ بىرنەشە وڭىرىندە سۋ تاسقىنىنا بايلانىستى توتەنشە جاعداي جاريالاندى.