ءۇيى سۋدىڭ استىندا قالعان 130 وتباسىنا جاڭا باسپانا بەرىلدى
استانا. KAZINFORM - سۋ تاسقىنىنان كەيىن 20 مىڭنان استام قازاقستاندىق وتباسى مەملەكەتتىك قولداۋعا يە بولعان. بۇل جايىندا ۇكىمەتتىڭ باسپا ءسوز قىزمەتىنەن حابارلاندى.
ق ر ۇكىمەتى مەملەكەت باسشىسى قاسىم-جومارت توقايەۆتىڭ تاپسىرماسى بويىنشا بيىلعى كوكتەمدە سۋ تاسقىنىنان زارداپ شەككەن ازاماتتارعا كەلتىرىلگەن زالالدى وتەۋ جۇمىسىن جالعاستىرىپ جاتىر.
بۇگىنگى تاڭدا 20601 وتباسى 7,4 ميلليارد تەڭگەدەن استام سوماعا 100 ا ە ك (369200 تەڭگە) مولشەرىندە ءبىرجولعى تولەم الدى.
مال شىعىنى ءۇشىن بەرىلگەن مەملەكەتتىك كومەك كولەمى 1,1 ميلليارد تەڭگەدەن استى.
11-مامىرداعى جاعداي بويىنشا 130 وتباسى ەسكى ءۇيىنىڭ ورنىنا جاڭا باسپاناعا يە بولدى.
بۇل رەتتە اقتوبە، قوستاناي، سولتۇستىك قازاقستان جانە پاۆلودار وبلىستارىندا زارداپ شەككەن ازاماتتارعا بەرىلەتىن 239 جاڭا ءۇي سالىنىپ جاتىر.
سونىمەن قاتار 568 وتباسى 710 ميلليون تەڭگەدەن استام سوماعا ءۇيىن جوندەۋگە جانە قالپىنا كەلتىرۋگە وتەماقى الدى.
جالپى العاندا زارداپ شەككەن وڭىرلەردە 9995 تۇرعىن ءۇي تەكسەرىلىپ، 7522 نىساندا باعالاۋ جۇمىستارى جۇرگىزىلدى.
زالالدى وتەۋ جۇمىستارى جالعاسىپ جاتىر جانە ۇكىمەتتىڭ قاتاڭ باقىلاۋىنا الىنعان.
ق ر پرەزيدەنتىنىڭ تاپسىرماسى بويىنشا بارلىق زارداپ شەككەن ازاماتتارعا جان-جاقتى كومەك پەن قولداۋ كورسەتىلەدى.
