ءۇمىتتىڭ بالقاشتاعى العاشقى 10 كۇنى: جولبارىس قاسقىر مەن قابان اۋلاعان
استانا. KAZINFORM - ەلىمىزدە 70 جىلدان اسا ۋاقىتتان كەيىن العاش رەت تابيعي مەكەنىنە جىبەرىلگەن امۋر جولبارىسىنىڭ ءۇمىت اتتى انالىعى تۋرالى قىزىق دەرەك جاريالاندى.
وسى ۋاقىت ىشىندە ماماندار ونىڭ قوزعالىسىن باقىلاپ، جۇرگەن جەرىن زەرتتەگەن.
«GPS قارعىباۋ ارقىلى جولبارىس قاي اۋماقتا بولعانى انىقتالىپ، كەيىن سول جەرلەرگە تەكسەرىس جۇرگىزىلەدى. العاشقى كۇندەردىڭ وزىندە ءۇمىت وزدىگىنەن اڭ اۋلاي الاتىنى بەلگىلى بولدى. مونيتورينگ بارىسىندا ونىڭ قاسقىر اۋلاپ، بىرنەشە كۇن بويى سول ولجامەن قورەكتەنگەنى انىقتالدى. كەيىن جابايى قاباندى دا ۇستاعان»، - دەدى ەكولوگيا جانە تابيعي رەسۋرستار مينيسترلىگى وكىلدەرى.
ۆەدومستۆو مالىمەتىنشە، بۇل - ءۇمىتتىڭ جاڭا ورتاعا بەيىمدەلىپ، تابيعي جاعدايدا ءوز بەتىنشە تىرشىلىك ەتە باستاعانىنىڭ بەلگىسى.
قازىر ماماندار ونىڭ قوزعالىسىن كۇن سايىن قاداعالاپ، تابيعي ورتاعا بەيىمدەلۋ بارىسىن ودان ءارى زەرتتەپ جاتىر.
ەسكە سالايىق، 31-شىلدەدە ىلە-بالقاش مەملەكەتتىك تابيعي رەزەرۆاتى اۋماعىندا تاريحي وقيعا تىركەلدى. 70 جىلدان اسا ۋاقىتتان كەيىن العاش رەت تابيعي مەكەنىنە امۋر جولبارىسىنىڭ ءۇمىت اتتى انالىعى جىبەرىلدى.
