ءيتتى باپتاي بىلسەڭ، سەنىمدى سەرىگىڭە اينالادى - كينولوگ
ورال. KAZINFORM – ب ق و پوليتسيا دەپارتامەنتىنە قاراستى كينولوگيالىق قىزمەت ورتالىعى قىلمىستىڭ الدىن الۋدا، اشۋدا، ەسىرتكى قىلمىستارىن انىقتاۋدا، قىلمىسكەرلەردى ىزدەستىرۋ مەن ۇستاۋ، سونىمەن قاتار قوعامدىق ءتارتىپتى ساقتاۋدا ارنايى دايىندىقتان وتكەن يتتەردى پايدالانادى.

كينولوگيادا ءيتتىڭ تۇقىمىنا ۇلكەن ءمان بەرەدى. مۇندا نەمىس وۆچاركاسى، بەلگيا وۆچاركاسى، لابرادور دەگەن تۇرلەرى بار. مۇنداي يتتەر ۇيرەتۋگە بەيىم ءارى شىدامدى كەلەدى.
كەيدە ولاردى ۇيرەتۋ ءبىر جىلعا دەيىن سوزىلادى. دايىنداۋى مەن بەيىمدەۋىنە قاراي ولاردى ءتۇرلى باعىتتا پايدالانادى.
قازىرگى تاڭدا كينولوگيا قىزمەتىنىڭ ودورولوگيا بولىمىندە پسيحواكتيۆتى زاتتاردىڭ ءيىسىن ىزدەپ، انىقتاي الاتىن يتتەر بار.
ولار تەك ىزدەۋگە عانا قاتىسپايدى. سونداي- اق قىزمەتتىك يتتەرمەن بىرگە كينولوگتار ەسىرتكى كونترابانداسىن انىقتاۋ ءۇشىن پوشتا جونەلتىلىمدەرىن ۇنەمى تەكسەرىپ وتىرادى.
سول ءبولىمنىڭ كينولوگ-مامانى، پوليتسيا كىشى سەرجانتى ەرجان قۋانىشيەۆ جاستايىنان ءيتتىڭ ءتىلىن ءتۇسىنىپ، كۇتىپ- باپتاۋدى ۇيرەنگەن.
قاسىنداعى سەنىمدى دوسى «دون» ەسىمدى نەمىس وۆچاركاسىمەن وسى بولىمدە قىزمەت اتقارىپ كەلەدى.
بۇدان بىرنەشە جىل بۇرىن ەرجان سامات ۇلى سۋعا باتىپ بارا جاتقان قوس بالانى قۇتقارىپ قالعان بولاتىن.
ونىڭ ايتۋىنشا، بۇل قىزمەت ۇلكەن جاۋاپكەرشىلىكتى، تياناقتىلىقتى، ەڭبەكقورلىقتى تالاپ ەتەدى.
«كينولوگ بولۋ ءۇشىن يتكە بار ماحابباتىڭدى بەرۋ جەتكىلىكسىز. ولاردى كۇشىك كەزىنەن باستاپ ۇيرەتەسىڭ، وسىرەسىڭ، دايىندايسىڭ. ول ىسكە شىدامدىلىق كەرەك. ونىڭ تاماعىن تويدىرىپ، سۋىن بەرۋمەن ءىس بىتپەيدى. جاڭا تۋعان بالانى قالاي ماپەلەسەڭ، ولارعا دا ءدال سونداي جاناشىرلىق قاجەت. قالاي ۇيرەتسەڭ، قاي باعىتتا باپتاساڭ، يت سەنىڭ سەنىمدى سەرىگىڭە اينالادى. كەيدە ءبارىبىر ول يت قوي دەپ جاتادى. ال، ولاردىڭ ادامعا دەگەن ادالدىعى، سەنىمدىلىگىندە شەك جوق. تەك ونى تۇسىنە ءبىلۋ كەرەك. تاعى ءبىر ايتار ماڭىزدى جايت، قىزمەتتە يتتەردى دۇرىس قولدانا الۋ كينولوگقا 70 پايىز قاتىستى. قالعان 30 پايىزى عانا يتكە بايلانىستى. سوندىقتان كاسىبي مامان بولۋ ۋاقىتپەن، تىنىمسىز ىزدەنۋمەن كەلەدى»، - دەيدى ە. قۋانىشيەۆ.
ب ق و پوليتسيا دەپارتامەنتىنىڭ مالىمەتى بويىنشا جىل باسىنان بەرى كينوگوگيالىق قىزمەتپەن 9 قىلمىس اشىلعان.
وعان قوسا ەسىرتكى قىلمىسىنا قارسى ءىس- قيمىل باسقارماسىنىڭ قىزمەتكەرلەرىمەن بىرگە 13 ەسىرتكى قىلمىسى اشكەرەلەندى.