ءۇندىستان مەن نەپالدا سۋ تاسقىنى مەن كوشكىننەن 70 ادام قازا تاپتى
استانا. KAZINFORM - ءۇندىستاندا نوسەر جاڭبىر، سۋ تاسقىنى جانە كوشكىن سالدارىنان 56 ادام، نەپالدا 14 ادام قازا تاپتى. نەپالدا تاعى 11 ادام حابار-وشارسىز كەتكەندەر قاتارىندا، دەپ حابارلايدى Reuters.
ءۇندىستاننىڭ ۋتتار- پرادەش شتاتىندا 25-قىركۇيەكتەن 27-قىركۇيەك تاڭىنا دەيىن 66,5 م م جاۋىن-شاشىن تۇسكەن. بۇل وسى كەزەڭدەگى قالىپتى كورسەتكىشتەن ايتارلىقتاي جوعارى. نورما بويىنشا بۇل ارالىقتا 7,6 م م جاۋىن-شاشىن ءتۇسۋى ءتيىس.
قۇتقارۋ قىزمەتتەرى سۋ باسقان اۋدانداردا جۇمىستارىن جالعاستىرىپ جاتىر. بيلىك گۋمانيتارلىق كومەك تاراتىپ، اۋىل شارۋاشىلىعىنا كەلتىرىلگەن شىعىندى باعالاپ جاتىر.
ءۇندىستاندا قازا تاپقان 56 ادامنان بولەك، 46 ادام زارداپ شەكتى، مىڭنان استام ءۇي زاقىمداندى.
نەپال بيلىگى ەلدەگى 77 وكرۋگتىڭ 49-ىندا كەنەتتەن بولاتىن سۋ تاسقىنى قاۋپى بار ەكەنىن ەسكەرتتى. ولاردىڭ جارتىسىنان استامىندا ءىرى وزەندەر مەن ولاردىڭ سالالارىنداعى سۋ دەڭگەيىنىڭ كوتەرىلۋىنە بايلانىستى سۋ تاسقىنى مەن سەل قاۋپى جوعارى بولىپ وتىر.
نەپالدىڭ ءبىرقاتار اۋدانىندا ەلەكترمەن قامتۋ جۇيەسى تولىعىمەن بۇزىلدى. راحۋگانگا وزەنىندەگى سۋ تاسقىنى قۋاتى 40 مۆت بولاتىن گيدروەلەكتر ستانتسياسىنىڭ ينفراقۇرىلىمىنا جانە ەلەكتر بەرۋ جەلىلەرىنىڭ تىرەكتەرىنە دە زاقىم كەلتىردى.
ءۇندىستاندا ورتالىق سۋ كوميسسياسى جەتى شتاتتاعى 30 گيدرولوگيالىق بەكەتتە جاعداي كۇردەلى ەكەنىن حابارلادى. گانگ، گانداك، كوسي، باگماتي جانە نارمادا وزەندەرىن قوسا العاندا، بىرنەشە ءىرى وزەندەگى سۋ دەڭگەيى قاۋىپتى مەجەدەن استى.
سۋ تاسقىنى مەن كوشكىن نەپالدىڭ كەيبىر اۋداندارىنداعى تەلەكوممۋنيكاتسيا جۇمىسىنا دا كەدەرگى كەلتىردى. بۇعان تالشىقتى-وپتيكالىق جەلىلەردىڭ زاقىمدانۋى جانە ەلەكتر ەنەرگياسىنىڭ ءۇزىلۋى سەبەپ بولدى.
بۇدان بولەك، نەپالدىڭ سولتۇستىگىندەگى مانانگ وكرۋگىندە بيىكتىگى 7126 مەتر حيملۋنگ-حيمال تاۋىنىڭ ماڭىنداعى بازالىق لاگەردى قار كوشكىنى باسىپ قالعاننان كەيىن جەرگىلىكتى ون جۇمىسشى حابار-وشارسىز كەتتى.
ەسكە سالايىق، نەپالدا 26-تامىزدا بولعان جويقىن سۋ تاسقىنىنان قازا تاپقاندارعا بايلانىستى 7-قىركۇيەك ۇلتتىق ازا تۇتۋ كۇنى دەپ جاريالانعان ەدى. مەملەكەتتىك مەكەمەلەردە تۋلار تومەن ءتۇسىرىلىپ، قازا بولعانداردىڭ وتباسىلارى ءداستۇرلى ازا تۇتۋ راسىمدەرىن وتكىزدى. نەپالداعى سۋ تاسقىنىنان قازا تاپقاندار سانى 1,4 مىڭ ادامنان استى.
