ءىرى جول اپاتىنان 10 ادام قازا تاپتى

تۇركيانىڭ سولتۇستىك-باتىسىنداعى ساكاربيا پروۆينتسياسىنىڭ ماڭىندا ءىرى جول اپاتى بولىپ، ون ادام قازا تاپتى. جاراقات العاندار دا بار، دەپ حابارلايدى Kazinform.

بۇگىن تاڭعى 04:36 كەزىندە (استانا ۋاقىتى بويىنشا 07:36) تەكەلەر اۋدانىنداعى «ساكاريا-سولتۇستىك مارمارا» تاسجولىندا 7 كولىك قاقتىعىسقان اپات سالدارىنان 10 ادام وقيعا ورنىندا قازا تاۋىپ، 59 ى جاراقات الدى.

ونىڭ ىشىندە 8 ادام اۋىر حالدە جاتىر.

قايتىس بولعانداردىڭ كوبى جولدىڭ جۇرەتىن بولىگىنە شىعىپ كەتكەندىكتەن كوز جۇمدى. ولاردى باسقا كولىكتەر قاعىپ كەتكەن.

وقيعا ورنىن ارالاعان ايماق گۋبەرناتورى يا. كارادەنيز زارداپ شەككەندەر ءارتۇرلى اۋرۋحانالاردا ەمدەلىپ جاتقانىن ايتتى.

ونىڭ ەكەۋى قوجاەلىدەگى ەمدەۋ مەكەمەلەرىنە جىبەرىلسە، قالعانى ساكاريا پروۆينتسياسىنىڭ ورتالىعى مەن اۋداندارىنا جەتكىزىلگەن.

- العاشىندا جەڭىل اۆتوكولىك جۇك كولىگىنە سوعىلعان دەگەن بولجام بار. سوسىن وعان باسقا كولىك قۇرالدارى كەپ سوقتىعىستى، - دەدى قالا باسشىسى.

تۇركيانىڭ كولىك جانە ينفراقۇرىلىم ءمينيسترى ا. ۋرالوعلى وقيعا ورنىنا جەدەل توپتاردىڭ شۇعىل جىبەرىلگەنىن ايتتى.

ماگيسترالدا بارلىق قاجەتتى ساقتىق شارالارى جاسالعان.

تۇركيا دەنساۋلىق ساقتاۋ ءمينيسترى فاحرەتتين كوجا ءوز مالىمدەمەسىندە زارداپ شەككەندەردىڭ 30 جەدەل جاردەم كولىگىمەن اۋرۋحاناعا جەتكىزىلگەنىن اتاپ ءوتتى.

الدىن الا مالىمەت بويىنشا، جول اپاتىنا ءۇش اۆتوبۋس، جۇك كولىگى جانە تاعى ءۇش كولىك قاتىسقان. اپاتقا قالىڭ تۇمان سەبەپ بولۋى مۇمكىن.

تۇركيانىڭ ادىلەت ءمينيسترى ي. تۋنچ ءوز كەزەگىندە اپاتتى تەرگەۋگە 3 پروكۋرور جۇمىلدىرىلعانىن ايتتى.

ايماقتاعى اۋرۋحانالارعا ءالى دە ادامدار اكەلىنىپ جاتىر. زارداپ شەككەندەر مەن قازا تاپقاندار اراسىندا باسقا ەلدەن كەلگەن تۋريستەر، سونىڭ ىشىندە قازاقستاندىقتار بار-جوعى ناقتىلانباعان.

كولىكتەر جولدان شىعارىلىپ، تازالاۋ جۇمىستارى جۇرگىزىلگەننەن كەيىن كولىك قوزعالىسىنا جابىلعان جولدىڭ ىستانبۇل باعىتى ءبىر جولاقتان باقىلاناتىن تارتىپپەن اشىلدى.