عىلىمدى سيفرلاندىرۋ: ولجاس بەكتەنوۆ ناقتى ءۇش تاپسىرما جۇكتەدى

استانا. KAZINFORM - ق ر پرەمەر- ءمينيسترى ولجاس بەكتەنوۆ ۇكىمەت وتىرىسىندا عىلىمدى سيفرلاندىرۋ باعىتىندا ءبىرقاتار تاپسىرما بەردى.

- وتاندىق عىلىمنىڭ تيىمدىلىگىن ارتتىرىپ، ينۆەستيتسيالىق تارتىمدىلىعىنىڭ بارلىق پروتسەستەرى اشىق بولۋىن قامتاماسىز ەتۋ ءۇشىن جۇمىستاردى بارىنشا جانداندىرۋ قاجەت بولادى، - دەدى ۇكىمەت باسشىسى.

سونداي-اق ول مىنانداي تاپسىرمالار بەردى:

1. عىلىم مينيسترلىگى مۇددەلى مەملەكەتتىك ورگاندارمەن بىرلەسىپ، عىلىم ينستيتۋتتارى مەن يننوۆاتسيالىق وندىرىستەردىڭ اۋماقتىق شوعىرلانۋىن ەسكەرە وتىرىپ، عىلىمي قالاشىقتار قۇرۋ تۇجىرىمداماسىن ازىرلەۋى ءتيىس.

2. اكىمدىكتەر ۇلتتىق ەكونوميكا، عىلىم، قارجى مينيسترلىكتەرىمەن بىرلەسىپ، وڭىرلەر بولىنىسىندە عىلىمدى دامىتۋ جونىندەگى ءىس- شارالاردى دەكومپوزيتسيالاۋ جۇمىسىن جۇرگىزۋى قاجەت. ءاربىر اكىمدىك عىلىمي-تەحنولوگيالىق سەسسيالار وتكىزىپ، عىلىمدى دامىتۋ جونىندە كەشەندى شارالار قابىلداۋى ءتيىس.

3. عىلىم جانە سيفرلاندىرۋ مينيسترلىكتەرى جىلدىڭ سوڭىنا دەيىن سيفرلىق عىلىم پورتالىن ىسكە قوسۋى ءتيىس. وندا بارلىق عىلىمي جوبالاردىڭ، گرانتتاردىڭ، زەرتتەۋ ناتيجەلەرى مەن جاريالانىمداردىڭ دەرەكقورلارىن ينتەگراتسيالاۋ كەرەك. عىلىمي زەرتتەۋلەر مەن ازىرلەمەلەردى ەنگىزۋ ءۇشىن جاساندى ينتەللەكت تەحنولوگيالارىن دا پايدالۋ قاجەت.

بۇل تاپسىرمالاردىڭ جۇزەگە اسىرىلۋى ق ر پرەمەر- ءمينيسترىنىڭ ورىنباسارى ەرمەك كوشەربايەۆقا جۇكتەلدى.

وسىعان دەيىن عىلىم سالاسىنداعى 19 بيزنەس- پروتسەسكە رەينجينيرينگ جۇرگىزىلگەنى تۋرالى جازدىق.