عىلىم تۋرالى زاڭعا قانداي وزگەرىستەر ەنەدى
الماتى. KAZINFORM - الماتىدا وتكەن ءماجىلىس جانىنداعى قوعامدىق پالاتانىڭ وتىرىسىندا «عىلىم جانە تەحنولوگيالىق ساياسات تۋرالى» زاڭ جوباسى تالقىلاندى.
ءماجىلىس دەپۋتاتى، پالاتا ءتوراعاسى ايدوس سارىم جەتەكشىلىك ەتكەن وتىرىسقا ءماجىلىس دەپۋتاتتارى، عىلىم جانە جوعارى ءبىلىم مينيسترلىگىنىڭ وكىلدەرى، عالىمدار مەن ساراپشىلار، عىلىمي-زەرتتەۋ ينستيتۋتتارى مەن جوعارى وقۋ ورىندارىنىڭ باسشىلارى قاتىستى.
ايدوس سارىمنىڭ ايتۋىنشا، عىلىم جانە عىلىمي-تەحنيكالىق قىزمەت جەتىستىگىن كوممەرتسيالاندىرۋ تۋرالى قولدانىستاعى زاڭدار بۇگىنگى كۇنى وزەكتىلىگىن جوعالتىپ، ۋاقىتتىڭ ناقتى سىن- قاتەرىنە جاۋاپ بەرە الماي وتىر.
الايدا، ەكى زاڭدى ءبىر زاڭعا مەحانيكالىق تۇردە بىرىكتىرىپ، تۇزەتۋگە ەندى كەلمەيدى.
«ءبارىمىزدى الاڭداتىپ وتىرعان ماسەلەلەردىڭ ءبىرى - عىلىمي قىزمەتكە جاس كادرلاردى تارتۋ، جالپى، عىلىمنىڭ بەدەلى مەن ابىرويى. بۇل تۋرالى وتكەن جىلى عىلىم جانە جوعارى ءبىلىم ءمينيسترىنىڭ ءوزى ايتقان ەدى. سونداي- اق عىلىمدى قارجىلاندىرۋ ماسەلەسى بار. ءبىز ءارتۇرلى مەحانيزمدەر، ونىڭ ىشىندە مەملەكەتتىك بار ەكەنىن بىلەمىز، ول بۇگىندە ۇلكەن سىنعا ۇشىراپ وتىر. ءبىزدىڭ زاڭداردا ءىرى جەر قويناۋىن پايدالانۋشىلار پايدانىڭ 1 پايىزىن عىلىمي ماقساتقا اۋدارۋى كەرەك دەگەن نورما بار، الايدا، ونىڭ قايدا كەتىپ جاتقانى بەلگىسىز. بۇل ماسەلەنىڭ ءبارىن ءبىز بۇگىنگى وتىرىستا شەشە الماسپىز، ءبىراق سالانىڭ نەگىزگى زاڭىن تالقىلاۋعا، ءوز ۇسىنىسىمىزدى جەتكىزۋگە، قانداي باعىتتار قامتىلماعانىن كورۋگە مۇمكىندىگىمىز بار»، - دەدى ايدوس سارىم.
كەيىن وتىرىستى قورىتىندىلاي كەلە، ايدوس سارىم قارجىلاندىرۋ ەڭ الدىمەن ەل ەكونوميكاسىنىڭ باسىم ماقساتتارىنا باعىتتالۋى كەرەك ەكەنىن مالىمدەدى.
بۇل رەتتە گۋمانيتارلىق عىلىمدار شەتتە قالماۋى كەرەك. ايدوس سارىم زاڭ ەكى ماڭىزدى نارسەنى انىقتايتىنىن اتاپ ءوتتى.
«ءبىرىنشى - مەملەكەتتىڭ وسى سالاعا قاتىناسى. بۇگىن ونىڭ شىنىمەن قۇرمەتتى ماماندىق بولۋى، ادامدار سول ءۇشىن عىلىمعا بارۋى ءۇشىن عالىمنىڭ جەكە مارتەبەسىن زاڭمەن بەلگىلەۋ تۋرالى پىكىر ايتىلدى. ەكىنشى باسىمدىق - ءبىز ۋاقىتپەن بىرگە اياق الىپ ءجۇرۋىمىز كەرەك. بۇل رەتتە تەحنولوگيالىق ساياسات تۋرالى سۇراق تۋىندايدى. ءبىزدىڭ عالىمدارىمىزدىڭ ەڭبەكتەرى كابينەتتىك بولماۋى كەرەك، ولار وندىرىسكە، ونەركاسىپكە، بيزنەسكە بارۋى كەرەك، ءبىزدىڭ بيزنەس پاتەنتتى قاجەت ەتۋى كەرەك، وندا يننوۆاتسيالار كوپ بولۋى كەرەك. ايتالىق، ەگەر وتاندىق عالىمدار قانداي دا ءبىر يننوۆاتسيا ازىرلەسە جانە ولار الەمدىك دەڭگەيدە پاتەنتتەلسە، بۇل ەل ءۇشىن دە ۇلكەن مۇمكىندىك سانالادى. بىزدە الەمدىك كوشباسشى بولا الاتىن بىرنەشە ۇلكەن سالا بار. اتوم ونەركاسىبى، مەديتسينانىڭ كەيبىر جەكە باعىتتارى. ءبىز بۇل باسىمدىقتاردى زاڭمەن رەتتەۋىمىز كەرەك»، - دەپ اتاپ ءوتتى ايدوس سارىم.
ءماجىلىس دەپۋتاتى ەكاتەرينا سمىشليايەۆا ساراپشىلار قانداي ۇسىنىستار ەنگىزگىسى كەلەتىنىن ايتتى.
«زاڭ جوباسى جاڭا رەداكتسيادا تالقىلانىپ جاتىر. جاڭا قۇجات شىققالى وتىرعانىن اتاپ ءوتۋ كەرەك، سوندىقتان كوپتەگەن تۇجىرىمدامالىق دۇنيەلەر قاراستىرىلدى، ول - ىرگەلى عىلىم سالاسىنداعى باسىمدىق، ونىڭ ىشىندە ۇلتتىق ستاندارت، عىلىمي زەرتتەۋلەردىڭ ساپاسىن باعالاۋ، عىلىمي دارەجەلەردى قالىپتاستىرۋ جانە تاعى باسقاسى. زاڭ جوباسىنىڭ كەلەسى ماڭىزدى مىندەتى - قولدانبالى عىلىمي زەرتتەۋلەر. ءبىز عىلىمدى تاجىريبە، وندىرىسپەن، ياعني، تەحنولوگيامەن بىرىكتىرىپ، دوستاستىرۋىمىز كەرەك. قولدانبالى بولىكتەر بويىنشا عىلىمي ينفراقۇرىلىم ماسەلەسى قارالىپ جاتىر»، - دەدى ول.
