ءۇي جانىنداعى دۇكەندەر ساۋدا ۇستەمەسى تالابىن قالاي ورىنداپ وتىر

استانا. KAZINFORM - تاۋارلارعا بەلگىلەنگەن شەكتى ۇستەمە باعانى اسىرىپ قويعانى ءۇشىن وتكەن جىلى كوشە بويىنداعى جانە ءۇي جانىنداعى دۇكەندەرگە 4,3 مىڭ اكىمشىلىك قاۋلى شىعارىلدى. بۇل تۋرالى ساۋدا جانە ينتەگراتسيا مينيسترلىگىنەن ءمالىم ەتتى.

- قازاقستان رەسپۋبليكاسىنىڭ ساۋدا قىزمەتىن رەتتەۋ تۋرالى زاڭناماسىنىڭ ساقتالۋىنا مەملەكەتتىك باقىلاۋدى جۇزەگە اسىرۋ اياسىندا مينيسترلىكتىڭ اۋماقتىق دەپارتامەنتتەرى ەلىمىزدىڭ زاڭناماسىنا سايكەس تۇراقتى نەگىزدە تەكسەرۋلەر جۇرگىزەدى. «اكىمشىلىك قۇقىق بۇزۋشىلىق تۋرالى» كودەكسىنىڭ 204-4 بابىنا سايكەس، ىشكى ساۋدا سۋبەكتىسىنىڭ الەۋمەتتىك ماڭىزى بار ازىق-تۇلىك تاۋارلارىنا (ءا م ا ت) ساۋدا قىزمەتىن رەتتەۋ تۋرالى زاڭناماسىندا بەلگىلەنگەن ساۋدا ۇستەمەسىنىڭ مولشەرىن ارتتىرۋى ەسكەرتۋ جاساۋعا الىپ كەلەدى. اكىمشىلىك جازا قولدانىلعاننان كەيىن، ءبىر جىل ىشىندە قايتالاپ جاسالعان ءىس-ارەكەت - شاعىن كاسىپكەرلىك سۋبەكتىلەرىنە - 10، ورتا كاسىپكەرلىك سۋبەكتىلەرىنە - 75، ءىرى كاسىپكەرلىك سۋبەكتىلەرىنە 300 ايلىق ەسەپتىك كورسەتكىش مولشەرىندە ايىپپۇل سالۋعا الىپ كەلەدى، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.

ماسەلەن، 2024 -جىلى مينيسترلىكتىڭ اۋماقتىق دەپارتامەنتتەرى ءا م ا ت-قا ساۋدا ۇستەمەسىنىڭ مولشەرىن اسىرعانى ءۇشىن 4384 اكىمشىلىك قاۋلى شىعاردى، ونىڭ ىشىندە 16,8 ميلليون تەڭگە سوماسىنا 284 ايىپپۇل سالىندى جانە 4100 ەسكەرتۋ بەرىلدى. ال 2023 -جىلى ءا م ا ت-قا ساۋدا مولشەرىن اسىرعانى ءۇشىن 760 اكىمشىلىك قاۋلى شىعارىلسا، ونىڭ ىشىندە 6 ميلليون تەڭگە سوماسىنا 51 ايىپپۇل مەن 709 ەسكەرتۋ بولدى.

- ارتىق دەلدالداردى بولدىرماۋ، سونداي-اق ءا م ا ت باعاسىنىڭ ءوسۋىن تەجەۋ ماقساتىندا ازىق-تۇلىك تاۋارلارىنا باعا بەلگىلەۋدىڭ بۇكىل تىزبەگى بويىنشا دەلدالدىق سحەمالاردى تەرگەۋ جونىندەگى وڭىرلىك كوميسسيالار جۇمىس ىستەيدى. وڭىرلىك كوميسسيالاردىڭ ماقساتى - ءونىمسىز دەلدالداردى انىقتاۋ جانە ولارعا تىيىم سالۋ، الەۋمەتتىك ماڭىزى بار ازىق-تۇلىك تاۋارلارىن ساتۋ كەزىندە ساۋدا ۇستەمەسىنىڭ مولشەرىن اسىرا باعالاۋدى انىقتاۋ. مەملەكەتتىك باقىلاۋ فۋنكتسياسى ساۋدا جانە ينتەگراتسيا مينيسترلىگىنە بەرىلگەن ساتتەن باستاپ وڭىرلىك كوميسسيالاردىڭ قىزمەتى فيسكالدىق جانە باسقا دا ورگانداردى تارتا وتىرىپ كۇشەيتىلدى (ب ق د ا، ق م ا، ق م م ك ك). 2024 -جىلى 1,4 مىڭنان استام وتىرىس وتكىزىلدى، 4,4 مىڭنان استام ءونىمسىز دەلدال انىقتالىپ، ىشكى ساۋدا سۋبەكتىلەرىنە قاتىستى اكىمشىلىك ىستەر قوزعالدى (2023 -جىلى - 1059 اكىمشىلىك ءىس، 2022 -جىلى - 310 اكىمشىلىك ءىس)، - دەپ اتالىپ وتكەن ۆەدومستۆو اقپاراتىندا.

اتاپ ايتقاندا، بيىل جىل باسىنان باستاپ جەرگىلىكتى اتقارۋشى ورگاندار وڭىرلىك كوميسسيالارىنىڭ 153 وتىرىسى وتكىزىلىپ، 530 ءونىمسىز دەلدال جانە ساۋدا ۇستەمەسىنىڭ اسىپ كەتۋ فاكتىلەرى انىقتالدى (506 اكىمشىلىك حاتتاما تولتىرىلدى، 24 دەلدالعا تىيىم سالىندى). كوميسسيا جۇمىسىنىڭ ناتيجەسىندە الەۋمەتتىك ماڭىزى بار ازىق-تۇلىك تاۋارلارىن ساتاتىن دەلدالدار جويىلادى جانە سورەلەردەگى باعالار 5 تەن %15  عا دەيىن تومەندەتىلەدى.

بۇعان دەيىن ءۇي جانىنداعى دۇكەندەر مەن الەۋمەتتىك تاۋار ساتۋشىلار ءۇشىن ق ق س وسپەيتىنىن جازعان ەدىك.

اۆتور

رۋسلان عابباسوۆ