ءى ءى م ەلەكترموبيلدەرگە ارنالعان جاسىل مەملەكەتتىك نومىرلەردى بەكىتتى
استانا. KAZINFORM - قازاقستاندا ەلەكتروموبيلدەرگە ارنالعان بولەك مەملەكەتتىك تىركەۋ نومىرلەرىن ەنگىزۋ جوسپارلانىپ وتىر.
ىشكى ىستەر مينيسترلىگى جەڭىل جانە جۇك ەلەكتروموبيلدەرىنە، ەلەكترلى اۆتوبۋستار مەن موتوتسيكلدەرگە ارنالعان جاڭا ءنومىر ۇلگىلەرىن قاراستىراتىن وزگەرىستەردى ازىرلەدى. ولاردىڭ باستى ەرەكشەلىگى - ءوڭىر كودى جازىلاتىن بولىگى جاسىل بولادى.
وزگەرىستەرگە سايكەس، جەكە جانە زاڭدى تۇلعالاردىڭ ەلەكتروموبيلدەرىنە بولەك ءنومىر تۇرلەرى قاراستىرىلادى. ولاردىڭ ۇلگىسى كولىكتىڭ ساناتىنا جانە ءنومىردىڭ ورناتىلاتىن ورنىنا قاراي ەرەكشەلەنەدى.
ماسەلەن، جەڭىل ەلەكتروموبيلدەردىڭ الدىڭعى جانە ارتقى بولىگىنە ورناتىلاتىن نومىرلەردىڭ ۇلگىلەرى ازىرلەنگەن. جۇك ەلەكتروموبيلدەرى مەن ەلەكترلى اۆتوبۋستارعا دا بولەك نۇسقالار قاراستىرىلعان. سونداي-اق ەلەكترلى موتوتسيكلدەر مەن موتوروللەرلەرگە ارنالعان ارنايى نومىرلەر پايدا بولادى.
جاڭا نومىرلەردىڭ نەگىزگى ءتۇسى اق، ال ءوڭىر كودى جازىلاتىن بولىگى جاسىل بولادى. سيفرلار، ارىپتەر جانە KZ بەلگىسى قارا تۇسپەن جازىلادى.
ىشكى ىستەر ورگاندارىنىڭ ارنايى جانە جەدەل قىزمەتتەرىنە تيەسىلى ەلەكتروموبيلدەر ءۇشىن بولەك ۇلگىلەر قاراستىرىلعان. ولاردىڭ ءنومىرى كوك ءتۇستى، ءوڭىر كودىنىڭ اياسى جاسىل، ال تاڭبالارى اق بولادى.
وزگەرىستەر ديپلوماتيالىق كولىكتەرگە دە قاتىستى. ديپلوماتيالىق وكىلدىكتەر مەن كونسۋلدىق مەكەمەلەر قىزمەتكەرلەرىنىڭ قىزمەتتىك جانە جەكە ەلەكتروموبيلدەرىنە، قۇرمەتتى كونسۋلداردىڭ، سونداي-اق شەتەلدىك زاڭدى تۇلعالار مەن ازاماتتاردىڭ كولىكتەرىنە ارنالعان جاڭا ءنومىر ۇلگىلەرى ەنگىزىلەدى.
بۇل ساناتتار ءۇشىن بولەك تۇستەر قاراستىرىلعان. اتاپ ايتقاندا، ديپلوماتيالىق نومىرلەر قىزىل، ال شەتەلدىك كولىكتەردىڭ ءبىرقاتار وزگە ساناتىنا ارنالعان نومىرلەر سارى بولادى. ولاردىڭ دا ءوڭىر كودى جازىلاتىن بولىگى جاسىل تۇسپەن ەرەكشەلەنەدى.
831-بۇيرىقتىڭ 2027-جىلعى 1-قاڭتاردان باستاپ كۇشىنە ەنۋى كوزدەلگەن. الايدا نومىرلەردىڭ جەكەلەگەن ساناتتارىنا قاتىستى وزگەرىستەردىڭ ءبىر بولىگى ەرتەرەك، ياعني قۇجات العاش رەسمي جاريالانعاننان كەيىن كۇنتىزبەلىك ون كۇن وتكەن سوڭ قولدانىسقا ەنگىزىلۋگە ءتيىس.
ەسكە سالايىق، بۇعان دەيىن ەلەكتروموبيلدەرگە جاسىل ءنومىر بەرۋ تۋرالى ۇسىنىس قولداۋ تاپپاعان ەدى. وعان مۇنداي بەلگىلەردىڭ مەملەكەتتىك قىزمەتتەردىڭ قولدانىستاعى ارنايى نومىرلەرىمەن شاتاستىرىلۋى مۇمكىن ەكەنى سەبەپ بولعان.
ونىڭ ورنىنا ەلەكتروموبيلدەردى ءنومىر جۇيەسىن وزگەرتپەي-اق اجىراتۋعا مۇمكىندىك بەرەتىن ارنايى جاپسىرمالار ەنگىزىلگەن بولاتىن.
