ءوزى تىلىنەن تاپقان شىعار: بيشىمبايەۆتى ۇستاعان استانالىق پوليتسەيلەر جازالاندى

استانا. KAZINFORM - ازاماتتىق نەكەدەگى ايەلىن ءولتىردى دەگەن كۇدىكپەن ەكس-شەنەۋنىكتى ۇستاعان ەكى پوليتسيا قىزمەتكەرىنە سوگىس جاريالاندى.

قۋاندىق بيشىمبايەۆتىڭ ىسىنە قاتىستى سوت وتىرىسى كەزىندە پوليتسەيلەردىڭ كۇدىكتىنى ۇستاۋ ءساتىنىڭ ۆيدەوسى كورسەتىلدى.

وندا پوليتسيا قىزمەتكەرى ق. بيشىمبايەۆتان «ءوزى تىلىنەن تاپقان شىعار؟» (اڭگىمە سالتانات نۇكەنوۆا تۋرالى) دەپ سۇرايدى.

بۇل فاكت بويىنشا قىزمەتتىك تەرگەۋ باستالعان ەدى.

سونىمەن قاتار وقيعا ورنىندا بولعان باسقا قىزمەتكەرگە دە تەكسەرۋ تاعايىندالدى.

بەينەجازبادان ونىڭ كۇدىكتىمەن بىرگە كوشەدە تەمەكى شەگىپ، جەرگە تۇكىرگەنىن بايقاۋعا بولادى.

بۇگىن ىشكى ىستەر مينيسترلىگى ەكى ءتارتىپ ساقشىسىنا قاتىستى تەرگەۋدىڭ اياقتالعانىن حابارلادى.

«اتالعان فاكتى بويىنشا استانا قالاسىنىڭ پوليتسيا دەپارتامەنتى جۇرگىزگەن قىزمەتتىك تەرگەۋ اياقتالدى. قۇقىق قورعاۋ قىزمەتى تۋرالى زاڭنىڭ 19، 56-57-باپتارىنا سايكەس، سونداي-اق تارتىپتىك كوميسسيانىڭ شەشىمىمەن قىزمەتتىك ءتارتىپتى بۇزعانى ءۇشىن پاترۋلدىك پوليتسيا پولكى قىزمەتىنىڭ ينسپەكتورىنا سوگىس جاريالاندى» دەلىنگەن حابارلامادا.

ودان بولەك، ق ر اكىمشىلىك قۇقىقبۇزۋشىلىق تۋرالى كودەكستىڭ 434-2-بابىنىڭ تالاپتارىن بۇزعانى ءۇشىن (جالپى پايدالانۋ ورىندارىن لاستاۋ) استانا قالاسىنىڭ پوليتسيا دەپارتامەنتى ەسىل اۋدانىنىڭ جەدەل ۋاكىلىنە قاتاڭ سوگىس جاريالانعان.

ەسكە سالا كەتەيىك، قۋاندىق بيشىمبايەۆ 24 جىلعا سوتتالعان بولاتىن.

اۆتور
داۋلەت ىزتىلەۋ