ءوز ەلىمنىڭ تۋىن كوتەرەيىن دەپ اتاجۇرتقا ورالىپ ەدىم - ەسميگۋل كۋيۋلوۆا

پاريج. KAZINFORM - فرانسيا استاناسى پاريج قالاسىندا ءوتىپ جاتقان وليمپيادا ويىندارىندا بۇگىن دزيۋدودان ايەلدەر اراسىندا سىنعا تۇسكەن ەسميگۋل كۋيۋلوۆا جارىستان كەيىنگى اسەرىمەن ءبولىستى.

«بۇل مەنىڭ ءبىرىنشى وليمپيادام بولعاننان كەيىن پاريجگە جوعارى كوڭىل-كۇيمەن كەلىپ ەدىم. بۇل قارسىلاسىمدى ۇتامىن دەپ ويلاعانمىن. باسىندا ۇپاي جىبەرىپ الدىم. ارى قاراي ۇتۋعا ۋاقىت تارشىلىق ەتتى»، - دەدى كۋيۋلوۆا.

سوىنمەن قاتار، وزبەكستاننان ەلگە ورالعانداعى باستى ماقساتىن دا ايتىپ بەردى.

«دزيۋدونىڭ الىپپەسىن وزبەكستاندا ۇيرەندىم. ءابيبا ءابۋجاقىنوۆا ەكەۋمىز دە وزبەكستاندا تۋدىق. ول ەلگە مەنەن بۇرىن كەتتى. كەيىن ماعان «سەن دە كەلىپ السايشى، قازاقستان ءوز ەلىمىز عوي» دەدى. اراعا بىرەر جىل سالىپ ءابيبادان كەيىن مەن دە ەلگە ورالدىم. اتاجۇرتقا كەلۋدەگى باستى ماقساتىم - وزبەكتىڭ تۋىن ەمەس، قازاقتىڭ تۋىن كوتەرۋ. وزبەكستاندا جۇرە بەرگەندە وليمپيادانى كورەر مە ەدىم، كورمەس پە ەدىم، بىلمەيمىن. ءبىراق، قازاق ەلىنىڭ، اتا قونىسىمىنىڭ اتىنان كەلگەن العاشقى وليمپيادا ويىنىمدا، العاشقى بەلدەسۋىمدە ۇتىلىپ قالعانىم وكىنىشتى بولدى. ەندى الدا، 3-تامىز كۇنى كوماندالىق سايىستا تاتاميگە قايتا شىعامىن»، دەدى سپورتشى.

ەستەرىڭىزگە سالا كەتەيىك، وسىعان دەيىن ەرلەر اراسىندا ابىلاي جۇبانازار دا العاشقى بەلدەسۋىندە ۇتىلىپ قالعان بولاتىن.

اۆتور
كۇنسۇلتان وتارباي