ءوز ەلىمدە، سىزدەردىڭ الدارىڭىزدا ونەر كورسەتەمىن - جانىبەك ءالىمحان ۇلى
استانا. KAZINFORM - قازاقستاندىق بوكسشى، ورتا سالماقتاعى WBO جانە IBF چەمپيونى جانىبەك ءالىمحان ۇلى 5-ساۋىردە استاناداعى «بارىس ارەنادا» جەڭىلىپ كورمەگەن فرانسۋز بوكسشىسى اناۋەل نگاميسسەنگەمەن رينگكە شىعادى.
بۇگىن استانادا جەكپە-جەككە ارنالعان باسپا ءسوز ءماسليحاتى.
- قۇرمەتتى قازاق ەلى! قۇرمەتتى جانكۇيەرلەر! مەن تۇڭعىش رەت قوس بىردەي چەمپيوندىق بەلدىگىمدى ءوز ەلىمىزدە قورعاعالى وتىرعان ءبىرىنشى قازاق اتانعالى وتىرمىن. بۇل مەن كۇتكەن باستى جەكپە-جەكتەردىڭ ءبىرى دەپ ويلايمىن. ءوز ەلىمدە، جەرگىلىكتى جانكۇيەرلەر الدىندا كەرەمەت بوكس كەشىن وتكىزۋدى ماقسات ەتىپ ءجۇر ەدىم. مىنە، سول كۇنگە، سول قىزىققا تولى بوكس كەشىن ەلوردامىزدا بىرگە وتكىزۋگە بارلىقتارىڭىزدى شاقىرامىن. بۇيىرتسا 5-ءساۋىر استانا قالاسىندا جۇدىرىقتاسامىز! ءوز ەلىمدە، سىزدەردىڭ الدارىڭىزدا ونەر كورسەتەمىن - دەدى جانىبەك ءالىمحان ۇلى باسپا ءسوز وتىرىسىندا.
ەسكە سالساق، جانىبەك ءالىمحان ۇلى سوڭعى جەكپە-جەگىن وتكەن جىلى 4-قازان كۇنى اۋستراليادا وتكىزىپ، جاڭا زەلانديالىق اندرەي ميحايلوۆيچتى توعىزىنشى راۋندتا تەحنيكالىق نوكاۋتپەن تىزە بۇكتىرگەن بولاتىن.
ايتا كەتەيىك، جانىبەك ءالىمحان ۇلىنىڭ 5-ءساۋىر استانا قالاسىندا جۇدىرىقتاساتىن قارسىلاسى فرانسيالىق بوكسشى - اناۋەل نگاميسسەنگۋ. ول وسىعان دەيىن 14 كەزدەسۋ وتكىزىپ، بارلىعىندا جەڭىسكە جەتكەن. ونىڭ 9 ىن مەرزىمىنەن بۇرىن جەڭگەن.
ەستەرىڭىزدە بولسا وسىعان دەيىن قر تۋريزم جانە سپورت ءمينيسترى ەربول مىرزابوسىنوۆ جانىبەك ءالىمحان ۇلىنىڭ كەزەكتى جەكپە-جەگى قازاقستاندا ۇيىمداستىرىلاتىنى تۋرالى حابارلاعان بولاتىن.
اۆتور كۇنسۇلتان وتارباي
