ءومىر كۇشتى، ءولىم ودان دا كۇشتى - ءجۇسىپ بالاساعۇن

  افوريزم - ءبىر ۇزىك وي، وقىس پىكىر، وقشاۋ ءسوز. افوريزم العاش دۇنيە قۇبىلىستارى جونىندە جيناقتالعان بىلىمدەرىن تۇيىندەپ، پىكىر ءبىلدىرۋدىڭ ءبىر ءتۇرى رەتىندە دۇنيەگە كەلگەن.

قازاق افوريزمدەرىنىڭ اسىل ارناسى دا ساق- سكيف داۋىرىندەگى ويشىلدار سوزدەرىنەن، كونە تۇركى جازبالارىنان باستاۋ الادى. «افوريزمدەر» ايدارىندا بۇگىن ءجۇسىپ بالاساعۇننىڭ ويلارىن ۇسىندىق.

( VIII - VIV ع ع. )

ءجۇسىپ بالاساعۇن

كىسى كوڭىلى ءتۇپسىز تۇڭعيىق.

تىلەكتىڭ شەگى بولمايدى.

ساعىنىش ءتۇبى - ءسۇيىنىش.

سوردىڭ سوڭى - باق.

قوشتاسۋ - جۇرەككە سالماق.

كىسىلىكتىڭ ۇلگىسى - مەيىرباندىق.

اتا ولسە - بالا امان.

جاقسى مىنەز ادامعا ازىق تا، كيىم دە تاۋىپ بەرەدى.

قۇرساقتا بىتكەن مىنەز قارا جەرگە بىرگە ەنەدى، سۇتپەن بىتكەن مىنەزدى ولگەنشە وزگەرتە المايسىڭ.

دوس تابۋ وڭاي، ساقتاۋى قيىن،

جاۋلاسۋ وڭاي، توقتاۋى قيىن.

حالىق بۇلىنسە ساياسات تۇزەيدى.

كەڭ پەيىل كىسىدە قۋلىق بولمايدى.

حاننىڭ ادىلەتسىزدىگى - بار پالەنىڭ باسى.

ساراڭ بەك ەل بيلەي المايدى.

ەلشىسى ەپسىز پاتشانىڭ باعى جانباس.

سايتان سۇيگەندى قۇداي سۇيمەيدى.

جاماندىق جاساساڭ، جاۋابى وكىنىش بولار.

ءوز پايداڭدى ويلاما، ەل پايداسىن ويلا: ءوز پايداڭ سونىڭ ىشىندە.

جامان مىنەز جاۋ قىلماعاندى قىلار.

بالدىڭ دا ۋى بار.

جازاسىن تارتپايتىن جاماندىق جوق.

ءادىل ءسوز اشى كورىنەر.

ادىلدىك اكىمدىكتەن دە كۇشتى.

عايبات ءىستىڭ ولشەمى - وكىنىش.

اققا قارا تەز جۇعار.

ايلاسىن اسىرعان ارىستان دا الار.

كىسىنى ىسىنەن تانى.

نە ىستەسەڭ دە ىقتيارىڭمەن ىستە.

اسىققان كەشىگەر.

ءتىلى مەن ءناپسىسىن تىيا بىلگەن، قاسيەتتى بويىنا جيا بىلەر.

شىدامدىنىڭ ايى وڭىنان تۋار.

ۇستامسىز بالەگە ۇرىنار.

قۇت كىرگەن قاقپانى جۇرت قاۋمالار.

ءومىر كۇشتى، ءولىم ودان دا كۇشتى.

بۇ دۇنيە كولەڭكەدەي وينايدى: قۋساڭ - قاشار، قاشساڭ - سەنەن قالمايدى.

بۇ دۇنيەدە ەكى- اق ەسىك بار: ءبىرى - ومىرگە قاراي اشىلادى، ەكىنشىسى - ولىمگە قاراي الا قاشادى. ءبىرىنشى ەسىككە ەنگەن ادام ەكىنشى ەسىككە دە ەنەدى.

ادام ءومىرى قىلدان نازىك.

ءولىم كەلسە، وكىنبەي- اق بارا بەر،

زارلاعانمەن ەستىمەيدى قارا جەر.

قىڭىر ءسوز - كۇيدىرگى.

تانىمى زور تامۇقتان دا قۇتىلار.

قىلىش ەلدى كۇزەيدى، قالام ەلدى تۇزەيدى.

تاق پەن باق ءبىر ەمەس.

( ەربول شايمەردەن ۇلى قۇراستىرعان «قازاق افوريزمدەرى» كىتابىنان ىرىكتەلىپ الىندى)

شىڭعىس مۇقايەۆ

egemen.kz